Marneulidə “Konstitusiya və Suverenlik İli” çərçivəsində bilik yarışı keçirilib
Gürcüstan Azərbaycanlılarının İnteqrasiya Mərkəzinin (GAİM) təşkilatçılığı ilə “Konstitusiya və Suverenlik İli” çərçivəsində sentyabrın 20-də Marneulidə azərbaycanlı şagirdlər arasında bilik yarışı keçirilib.
Crossmedia.az xəbər verir ki, yarışın açılışında çıxış edən GAİM-in icraçı direktoru Murad Muradov bu kimi layihələrin gənclərin hüquqi biliklərinin artırılmasına və onlara milli dəyərlərin açıqlanmasına xidmət etdiyini bildirib.
Azərbaycan Respublikasının Gürcüstandakı səfirliyinin müşaviri Samir Əbdürəhimov çıxış edərək “Konstitusiya və Severenlik İli” çərçivəsində bilik yarışmasının uğurla keçirilməsi münasibətilə iştirakçıları təbrik edib. O, Dövlət Suverenliyi Gününün tarixinə nəzər yetirərək suverenliyin tam bərpasında müasir müstəqil Azərbaycan dövlətinin banisi Ümummilli Lider Heydər Əliyevin və onun layiqli davamçısı Prezident İlham Əliyevin uğurlu siyasətinin, Azərbaycan Ordusunun rəşadətinin və Azərbaycan xalqının birliyinin rolunu qeyd edib. Diplomat belə bir uğurun əldə olunmasının təməlində istər ölkə rəhbərliyi, istərsə də Silahlı Qüvvələr səviyyəsində təhsil, səriştə və peşəkarlığın durduğunu nəzərə çatdırıb və bu xüsusda, bilik yarışması kimi təşəbbüslərin və ümumilikdə təhsilin vacibliyini vurğulayıb. 7 komandanın iştirak etdiyi yarışmada məktəblilərə Konstitusiya, dövlət suverenliyi və milli dəyərlərlə bağlı suallar təqdim olunub.
Yarışın nəticələrinə əsasən komanda hesabında Rustavi Təhsil və Mədəniyyət Mərkəzi (mərkəzin yetirmələri Lalə Mehdiyeva, Sulxan Allazov, Tamilə Omarova, Xədicə Yusubova, Mahir Dərziyev) birinci, Qabal İnkişaf Mərkəzinin şagirdləri (Səbinə Nəbiyeva, Səma İmamquluyeva, Lamiyə İmaməliyeva, Rəhman Namazov, Sona Sultanova) ikinci, GAİM-in şagirdləri (Simar Bayramov, Alihüseyn Mahmudov, Səhər Məmmədli, Nərminə Əliyeva, Amilə Ağayeva) isə üçüncü yerə çıxıblar.
21:23 20.09.2025
Oxunuş sayı: 832
