Hadisə

Zaqatalada sərnişindaşıma ilə bağlı qaydaları pozan şəxslər məsuliyyətə cəlb olunublar

Avtomobil nəqliyyatı ilə sərnişindaşımaya dair qanunvericiliyin tələblərinə daşıyıcılar tərəfindən riayət edilməsi məqsədilə Zaqatala Rayon Polis Şöbəsinin Dövlət Yol Polisi Bölməsinin və Azərbaycan Yerüstü Nəqliyyat Agentliyinin əməkdaşları tərəfindən birgə profilaktik tədbirlər keçirilib.

Crossmedia.az-ın məlumatına görə,Daxili İşlər Nazirliyinin mətbuat xidmətinin Şəki regional qrupundan bildirilib ki, həmin tədbirlər zamanı nəqliyyat vasitələrinin reysqabağı texniki baxışdan keçməsi, sürücülərin tibbi müayinəsinin təşkili, eləcə də bu sahədə daşımalara icazə verən buraxılış vəsiqəsi və kartların mövcudluğu yoxlanılıb.

Həmçinin sürücülərlə maarifləndirici söhbətlər aparılıb, onların bu sahədəki mövcud qaydalara riayət etmələrinin zəruriliyi vurğulanıb. Qayda pozuntusuna yol verən və müvafiq kateqoriyalı avtonəqliyyat vasitələrini idarə etmək hüququ olmayanlar inzibati məsuliyyətə cəlb olunublar.

“Baş verə biləcək xoşagəlməz halların qarşısının alınması məqsədilə bu sahədə tədbirlər mütəmadi olaraq davam etdirilir”, - deyə məlumatda vurğulanıb.