"Yüksəliş" qalibi: "Nə istədiyimi dəqiq bilirdim" - Müsahibə

Artıq bir neçə ildir təşkil olunan "Yüksəliş" layihəsi Azərbaycanda ciddi marağa səbəb olub. Müsabiqənin qaliblərindən bir çoxu bu gün yüksək vəzifələrdə çalışırlar. Təkcə bunun özü onu deməyə əsas verir ki, “Yüksəliş” idarəetmə prosesində mühüm rol oynamaqla, həm etibarlı, bacarıqlı kadrların tapılmasında, müəyyənləşdirilməsində mühüm rol oynayır. 

Crossmedia.az məsələnin aktuallığını nəzərə alaraq “Yüksəliş” hekayəsi” rubrikası çərçivəsində qaliblərlə silsilə müsahibələrə başlayır. 

İlk həmsöhbətimiz V müsabiqənin qaliblərindən biri Kamran Ələsgərovdur.

Müsahibəni təqdim edirik:

- Əvvəlcə oxucularımıza özünüz haqqında məlumat verməyinizi istərdik.

- Mən mühəndisəm. Təhsilimi Azərbaycan Dövlət Neft Akademiyasında almışam neft- qaz mühəndisliyi üzrə bakalavr təhsili almışam. Sonra isə Xəzər universitetində petrol mühəndisliyi üzrə magistratura təhsili almışam. Eyni zamanda BP şirkətinin dəstəyi ilə Heriot- Vatt universitetinin magistratua pilləsinə də daxil olmuşam. Hazırda "İmperial Collge London"da təhsil alıram. Həmçinin Azərbaycan Dövlət Neft Akademiyasında doktorantura təhsili alıram. 12 illik iş karyeram var. Bir çox böyük neft şirkətlərində, o cümlədən "Saypen", "Socar", "Total", BP və digər şirkətlərdə çalışmışam. Üç ilə yaxın dənizdə, Heydər Əliyev adına qazma qurğusunda işləmişəm. Hazırda BP "Global"da quyular üzrə baş mühəndis vəzifəsində əmək fəaliyyətimi davam etdirirəm. 

- Necə oldu ki, "Yüksəliş" müsabiqəsində iştirak etməyə verdiz?

- Daha əvvəl də müraciət etmişdim, amma idarəetmə mərhələsində yarım balla kəsilmişdim. Bu dəfə nə istədiyimi dəqiq bilirdim. Fikrimcə, bu amil qalib gəlməyimdə rol oynadı. "Yüksəliş" gənclərin özünü göstərməsi, imkanlarını təqdim etməsin üçün unikal şansdır. Düşünürdüm ki, gənc mütəxəssis kimi dövlətimə faydalı ola bilərəm. Odur ki, potensialımı təqdim etmək istədim. İndiyə kimi bir çox xarici şirkətlərlə, o cümlədən Norveç, İsveç, İtaliya, Niderland, Britaniya, Fransa şirkətlərlə işləmişəm.  İşğaldan azad olunmuş ərazilərdə- Qarabağda və Şərqi Zəngəzurda həyata keçirilən layihələrə töhfə vermək istəyirəm. Düşündüm ki, faydalı ola bilərəm. Və qərara gəldim ki, müsabiqədə iştirak edərək həm imkanlarımı ortaya qoyum, həm də kadr bankına düşüm. Xoşbəxtlikdən, qalib oldum. İndi fikirlərimi daha rahat şəkildə təqdim edəcəm. Mən TANAP layihəsində də çalışmışam. Bu gün o layihə barədə eşidəndə vaxtı ilə töhfə verdiyimə görə istər - istəməz fərəhlənirəm. Məncə, indiki bacarıqlarımla daha çox fayda verə bilərəm. Bunu bacarsam, daxilən daha rahat olacam. "Yüksəliş" həm müraciət etmək, həm imkanlarını təqdim etmək, özünü göstərmək baxımından unikal layihədir. Düşünürəm ki, xüsusilə final, yarımfinal mərhələsində bir çox iştirakçı özünü göstərə bildi. Digər qaliblər kimi mən də bir il mentorla çalışacam və öz istəklərimi bildirəcəm. Əlbəttə, onların da tövsiyələrini nəzərə alacam.

- Müsabiqə vaxtı elə bir hadisə oldumu ki, artıq qalib gələcəyinizə tərəddüd etməyə başladınız?

- Bəli, oldu. Və bu hadisədən dərs aldım. Yarımfinal mərhələsində ilk gün bütün gücümü, enerjimi ortaya qoydum. Odur ki, sonuncu gün çox yorğun idim. Sanki enerjimi düzgün bölüşdürə bilmədim. Əminəm ki, yarımfinalda yığdığım balın böyük əksəriyyətini birinci gün yığmışdım. Yeri gəlmişkən deyim ki, müsabiqədə çay fasiləsi zamanı təqdim olunan təamlar, o cümlədən şirniyyatlar çox dadlı idi. Orada kofe içəndən sonra özümə gəldim(gülür). Final mərhələsində isə gücümü bölmüşdüm və bu, effekt verdi. Dediyim kimi, "Yüksəliş" unikal layihədir.

- "Yüksəliş" yeni dostluqlar qurulması, yeni insanlar tanıma baxımından hansı əhəmiyyətə malikdir?

- Bir müddətdən sonra ailəyə çevrildiyimizi hiss etdik. Tanışlıqlar əsasən yarımfinal və filan mərhələsində yarandı. Keyslər zamanı insanların fərqli xüsusiyyətləri üzə çıxır. İştirakçılar öz dünyagörüşlərinə, fikirlərinə yaxın düşüncələrə sahib yoldaşları ilə təbii ki, tədricən dostlaşırlar. 

Məsələn, mən orada heç vaxt eyni masada oturmadığım bir iştirakçı ilə sonradan dost oldum. Yəni deməyim odur ki, eyni masa arxasında oturmaq şərt deyil. İkinci bir tərəfdən, iştirakçıların, xüsusilə final mərhələsinə gəlib- çatanların əksəriyyəti yaxşı mənada iddialı, pozitiv ambisiyalı adamlardır. “Yüksəliş” belə insanları bir araya yığması baxımından da unikal əhəmiyyətə malikdir.

- Suallar barədə nə deyə bilərsiniz? Dövlət İmtahan Mərkəzi sizi təəəcübləndirmədi ki?

- Məncə, dünyagörüşü ilə bağlı suallar kifayət qədər normal idi. Məntiq sualları çoxuna çətin gəlsə də, mənim üçün rahat idi. İdarəetmə və universal zəka sualları da çox xoşuma gəldi. Yeti gəlmişkən deyim ki, fikrimcə, idarəetmə sualları keçən il daha spesifik idi. Bu il isə xeyli dərəcədə ümumi idi. Görünən odur ki, “Yüksəliş” komandası emosional zəkaya xüsusi önəm verir. Bu, əlbəttə, yaxşı haldır. Məncə, emosional zəka bacarıqları hər kəsə lazımdır. Bir məqamı da da deyim ki, yarımfinal və final keysləri də çox maraqlı idi. Onların bir çoxu real həyatdan götürülmüşdü. Zənnimcə, keyslərlə bağlı səslənən fikirlər də çox unikal və maraqlı idi. Bu, yarımfinal və finala çıxan bacarıqlarının, geniş və analitik dünyagörüşlərinin  təzahürü kimi qiymətləndirilə bilər. Bir sözlə, suallar, təşkilatçılıq əla idi. 

- Kamran müəllim, bəzən deyirlər ki, ancaq xaricdə təhsil alanlar “Yüksəliş”də qalib ola bilirlər. Hərçənd siz özünüz də Azərbaycanda oxumuşunuz...

- Bayaq dediyim kimi, mən ölkəmizdə təhsil almaqla yanaşı, xarici universitetdə də oxumuşam. Lakin xarici universitet mənə sırf texniki bilik, savad verib. “Yüksəliş” müsabiqəsinin keyslərində oradan aldığım təhsilin heç bir xüsusi rolu olmayıb. “Yüksəliş”də tələb olunanlar illər ərzində, həyat tərzində, gündəlik məişətdə əldə olunan bacarıqlardır. Deməli, “Yüksəliş”in qalibi olmaq həm iştirakçıların həyat tərzindən asılıdır. Əlbəttə, qaliblər arasında xaricdə oxuyanlar da var. Amma xaricdə təhsil almaq meyar deyil. Meyar tələb olunan keyfiyyətlərə sahib olmaqdır. Onu da deyim ki, bu gün Azərbaycanda elə ali məktəblər var ki, xarici universitetlərdən yaxşı təhsil verir. Buna misal olaraq, Azərbaycan Diplomatiya Akademiyasını, yaxud da Dövlət İdarəçilik Akademiyasını göstərmək olar.

- VI müsabiqədən gözləntiləriniz nələrdir? Və ya hansısa təklifləriniz varmı?

- Final mərhələsində gördük ki, bəzi iştirakçılar üç, dördüncü dəfə iştirak edirdilər. Fikrimcə, bu, digər potensiallı insanların kənarda qalmasına səbəb olur. Zənnimcə, digərlərinə də şans vermək lazımdır. Xüsusilə nəzərə almaq lazımdır ki, “Yüksəliş”in tələb etdiyi bacarıqların bir çoxunun formalaşması üçün bir il müddət azdır. Ən azı, gərək iki – üç il özünü inkişaf etdirəsən. Həmçinin çox istəyərdim ki, yaradılan kadr bankı davamlı olsun. Bu, çox effektivdir. Məhz həmin kadr bankında olanların bir çoxu artıq yüksək vəzifələrə təyin olunub. 

- Son olaraq, sizcə, niyə gənclər “Yüksəliş”də iştirak etməlidirlər?

- Bunun üçün bir çox səbəb var. Hətta qalib gəlməsiniz belə, həmin keyslərdə siz özünüzün zəif tərəflərinizi tapa və onları düzəltmək imkanı əldə edəcəksiniz. Həmçinin dostlar tapacaq, fərqli sahələrdə nə qədər təcrübəli mütəxəssisin olduğunu görəcəksiniz.

Kənan Novruzov