Ukrayna Rusiyanın hərbi hava bazasına hücum edib
Ukrayna ordusu bu gün Rusiyanın Voronej vilayətində yerləşən Borisoglebsk hərbi hava bazasına hücum həyata keçirdiyini bəyan edib.
Crossmedia.az xəbər verir ki, bu barədə sosial media üzərindən yayılan açıqlamada bildirilib. Ukrayna xüsusi təyinatlı qüvvələri tərəfindən həyata keçirilən hücum nəticəsində qanadlı bombaların saxlandığı anbar və bir təlim təyyarəsi məhv edilib.
Ordu bəzi digər hava vasitələrinin də hədəf alındığını qeyd etsə də, onların detalları açıqlanmayıb. Ukrayna hərbi komandanlığı Borisoglebsk bazasının Rusiya Hərbi Hava Qüvvələrinə məxsus Su-34, Su-35S və Su-30SM döyüş təyyarələrinin əsas yerləşdiyi məkan olduğunu bildirib.
Rusiya rəsmiləri isə Ukraynanın gecə saatlarında ölkənin müxtəlif bölgələrinə genişmiqyaslı pilotsuz uçuş aparatları (İHA) ilə hücumlar təşkil etdiyini açıqlayıb. Rusiya Müdafiə Nazirliyinin məlumatına görə, üç saat ərzində ümumilikdə 42 İHA vurularaq zərərsizləşdirilib. Bunlardan 37-si Ukrayna ilə sərhəddə yerləşən Belqorod, Bryansk və Kursk bölgələrində məhv edilib.
Sankt-Peterburq şəhərinin cənubundakı iki bölgənin üzərində də İHA-ların vurulduğu bildirilib. Leningrad vilayətinin qubernatoru Aleksandr Drozdenko insident zamanı xəsarət və dağıntı olmadığını, lakin ehtiyat tədbiri olaraq Pulkovo hava limanının fəaliyyətinin müvəqqəti dayandırıldığını açıqlayıb.
Smolensk vilayətinin qubernatoru da bölgədə üç İHA-nın vurulduğunu, hadisə zamanı insan tələfatı və ya dağıntı qeydə alınmadığını bildirib. Ukrayna ilə sərhəddə yerləşən Voronej vilayətinin rəhbərliyi də “bir neçə” İHA-nın zərərsizləşdirildiyini açıqlayıb.
Qeyd edək ki, bu hücumlar Rusiyanın bir gün öncə Ukraynaya qarşı həyata keçirdiyi 539 İHA və 11 raketlə reallaşdırılan, Kiyevdə 23 nəfərin yaralandığı genişmiqyaslı hava hücumuna cavab kimi qiymətləndirilir. Bu, müharibənin başlanmasından bəri Ukraynaya qarşı ən böyük hava hücumu kimi dəyərləndirilmişdi.
Mədinə Cəlilova
21:30 05.07.2025
Oxunuş sayı: 10047
