DMX Azərbaycanda müvəqqəti olma müddəti uzadılmış əcnəbilərə və vətəndaşlığı olmayan şəxslərə müraciət edib
Azərbaycanda müvəqqəti olma müddəti uzadılmış əcnəbilər 2025-ci il iyulun 31-dək qərar verməlidirlər
2020-ci ilin martın 24-dən etibarən COVID-19 pandemiyası ilə əlaqədar olaraq Azərbaycan Respublikasının ərazisində qalmaq məcburiyyətində qalan, bu səbəbdən ölkəni tərk edə bilməyən və Dövlət Miqrasiya Xidməti tərəfindən müvəqqəti olma müddəti uzadılan əcnəbilər və vətəndaşlığı olmayan şəxslər üçün mühüm xəbərdarlıq edilib. Dövlət Miqrasiya Xidməti (DMX) həmin şəxslərin 2025-ci ilin iyulun 31-dək ölkədə qalmaqla bağlı hüquqi statuslarını müəyyən etmələri üçün müraciət etməli olduqlarını bildirib. Onlar ya Azərbaycan Respublikasının Miqrasiya Məcəlləsinin 45-ci maddəsində nəzərdə tutulan əsaslardan birinə uyğun olaraq müvəqqəti yaşama icazəsi üçün müraciət etməli, ya da ölkə ərazisini tərk etməlidirlər.
Crossmedia.az bildirir ki, bu barədə məlumat Dövlət Miqrasiya Xidmətinin mətbuat xidməti tərəfindən yayılıb. Qeyd olunub ki, müvəqqəti olma müddəti uzadılmış əcnəbilər və vətəndaşlığı olmayan şəxslər əlavə suallar və ətraflı məlumat üçün DMX-nin (012) 919 Çağrı Mərkəzinə, rəsmi Feysbuk və İnstaqram sosial şəbəkə hesablarına, eləcə də [email protected] elektron poçt ünvanına müraciət edə bilərlər.
Bu qərar həm pandemiya dövründə yaranmış hüquqi boşluqların tənzimlənməsi, həm də əcnəbilərin hüquqi vəziyyətlərinin şəffaflaşdırılması məqsədi daşıyır. DMX vətəndaşların və miqrantların mövcud qanunvericiliyə uyğun şəkildə hərəkət etmələrinin vacibliyini vurğulayıb.
16:34 01.07.2025
Oxunuş sayı: 9430
