Rusiyada azərbaycanlı ailəyə qarşı əməliyyat: iki nəfər ölüb, onlarla şəxs saxlanılıb
Dünən səhər saatlarında Rusiyanın Yekaterinburq şəhərində Federal Təhlükəsizlik Xidməti (FSB) və OMON qüvvələri tərəfindən azərbaycanlılara qarşı genişmiqyaslı əməliyyat həyata keçirilib.
Crossmedia.az Rusiya KİV-lərinə istinadən xəbər verir ki, əməliyyat nəticəsində, əslən Azərbaycanın Ağdam rayonundan olan Səfərovlar ailəsinin iki üzvü – Ziyəddin və Hüseyn Səfərov qətlə yetirilib. Ailənin digər üzvləri – Bakir, Akif, Ayaz, Kamal və Məzahir Səfərov daxil olmaqla səkkiz nəfər müxtəlif dərəcəli bədən xəsarətləri alaraq xəstəxanaya yerləşdirilib. Yaralılardan bir neçəsinin vəziyyəti ağırdır.
Jurnalist Seyfəddin Hüseynli: “Qardaşlarımı işgəncə ilə öldürüblər”
Hadisə ilə bağlı Səfərovların qardaşı, tanınmış jurnalist və “525-ci qəzet”in baş redaktor müavini Seyfəddin Hüseynli APA-ya açıqlama verib. O bildirib ki, əməliyyat zamanı heç bir xəbərdarlıq edilmədən evlərə basqın olunub:
“İki qardaşım öldürülüb, ailəmizdən onlarla insan saxlanılıb. Bu, 25 il əvvəl baş verən və hələ də tam aydınlaşdırılmamış bir cinayət işi ilə əlaqələndirilir. Onları işgəncə ilə qətlə yetiriblər.”
Hadisənin 2001-ci ildə Səfərovlar ailəsinə məxsus kafedə baş vermiş bir qətl hadisəsi ilə bağlı olduğu bildirilir. Rusiya mediası, o cümlədən “e1.ru” portalı, əməliyyat nəticəsində 50-dən çox şəxsin saxlanıldığını yazır.
Hadisə Yekaterinburqda yaşayan Azərbaycan icması arasında ciddi narahatlığa səbəb olub. Hüquq-mühafizə orqanlarından isə hələlik rəsmi açıqlama verilməyib.
Kübra Musayeva
09:22 28.06.2025
Oxunuş sayı: 11269
