Daha bir yanğın təhlükəli kafenin fəaliyyəti dayandırılıb
Fövqəladə Hallar Nazirliyinin (FHN) Dövlət Yanğın Nəzarəti Xidməti səlahiyyətləri daxilində ölkə ərazisində yanğın təhlükəsizliyinin təmin edilməsi məqsədilə zəruri tədbirlərin görülməsini davam etdirir.
Crossmedia.az FHN-ə istinadən xəbər verir ki, bu çərçivədə, Dövlət Yanğın Nəzarəti Xidməti tərəfindən Quba şəhəri, 22-ci məhəllə ünvanında yerləşən Zeynal Yarəli oğlu Yarəliyevin istifadəsində olan kafedə keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib. Belə ki:
- obyekt avtomatik yanğınхəbərverici siqnalizasiya qurğusu və ilkin yanğınsöndürmə vasitələri ilə təmin edilməyib;
- obyektin taxta konstruksiyaları odadavamlı məhlulla hopdurulmayıb;
- sıxılmış və mayeləşdirilmiş propan qaz balonlarından istifadə olunur;
- obyektin elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb və elektrik təsərrüfatına profilaktik baxış keçirilərək kabel və naqillərin izolyasiyasının gərginliyə qarşı muqavimətinin yoxlanılması barədə akt tərtib edilməyib;
- obyektin daşınmaz əmlakı “İcbari sığortalar haqqında” Azərbaycan Respublikasının Qanununa uyğun olaraq sığorta olunmayıb.
Mövcud vəziyyət onu göstərir ki, obyektin istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.
Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilmiş Quba şəhəri, 22-ci məhəllə ünvanında yerləşən Zeynal Yarəli oğlu Yarəliyevin istifadəsində olan kafenin fəaliyyətinin dayandırılması barədə qərar qəbul olunub və qərarın bir nüsxəsi obyektin nümayəndəsinə təqdim edilib.
12:56 14.06.2025
Oxunuş sayı: 711
