Çiyələk ətri Bakını bürüdü: festivaldan ən dadlı görüntülər
Bu gün Bakının Nizami Parkında – Ağ Şəhərdə fərqli bir bahar ovqatı yaşanır. Küçələri bürüyən çiyələk ətri, rəngli stendlər və gülümsəyən insanlar paytaxt sakinlərini Çiyələk Festivalının sehrinə salıb. Sözün əsl mənasında – burada çiyələk yalnız meyvə deyil, bir bayram simvoludur!
Crossmedia.az xəbər verir ki, səhər saatlarından etibarən festivala axın edənlər arasında uşaqlar, valideynlər, turistlər və gənc fotoqraflar var. Kiminin əlində səbət dolusu təzə çiyələk, kiminin əlində isə çiyələkli dondurma, içki və ya əl işi. Hər kəs bir az dadmaq, bir az şəkil çəkdirmək və ən əsası, bu şirin havanı duymaq istəyir.
Festivalın ən böyük maraq doğuran hissəsi isə mətbəx çadırlarıdır. Burada tanınmış şef aşpazlar çiyələkdən qeyri-adi yeməklər hazırlayır. Çiyələkli pizza, salat, hətta ət yeməkləri belə ziyarətçilərin təəccübünü və marağını qazanıb.
Əyləncə zonasında isə uşaqlar rəngarəng oyunlarda, üz boyama guşələrində, musiqi və rəqs proqramlarında iştirak edirlər. Ailələr üçün nəzərdə tutulmuş istirahət guşələrində isə insanlar festivalın dadını çıxarır.
Müsabiqənin təşkilatçılarından biri və eyni zamanda şef kimi iştirak edən Sərxan Məmmədov Crossmedia.az-a açıqlamasında maraqlı detalları bölüşüb:
“Festivalda iştirakçılar tərəfindən 36 növ çiyələkdən məhsul hazırlanmışdı. Ən unikal və bənzərsiz məhsul isə çiyələk dolması idi, lakin bu fikir uğurlu alınmamışdı. Ən yaxşılar arasında sobada hazırlanmış çiyələkli peraşki və çiyələkli tort yer alırdı. Xüsusilə çiyələkli tort maraq doğururdu – tərkibində bol çiyələk var idi və tortun özü də çiyələk formasında hazırlanmışdı. Bu isə onu həm dad, həm də görünüş baxımından çox maraqlı etmişdi.”
Festival yalnız mətbəx ləzzətləri ilə deyil, həm də incəsənət və yerli istehsal məhsulları ilə diqqət çəkib. Həyətdə qurulan əl işləri sərgisində çiyələk temalı zinət əşyaları, dekorativ əşyalar, suvenirlər və rəsm əsərləri təqdim olunub. Rəssamların yerindəcə çəkdiyi çiyələkli tablolara maraq böyük olub.Çiyələk sevərlərin böyük maraq göstərməsi isə bu cür tədbirlərin gələcəkdə daha da geniş miqyasda təşkil olunacağına ümid yaradır.
Nigar Rəhimova
16:34 17.05.2025
Oxunuş sayı: 15230
