Ingla School Baku - öyrənmənin zövqə çevrildiyi bir məkan
Bu gün Bakının səs-küylü ritmindən bir qədər uzaq, amma təhsil baxımından olduqca canlı bir məkanda – Ingla School Baku kursunda qonaq olduq. Müasir yanaşmaları ilə seçilən bu təhsil mərkəzinə səfər etməkdə Crossmedia.az-ın məqsədi dərslərin necə keçirildiyini, tədris prosesinin hansı atmosferdə baş tutduğunu yerindəcə görmək, yazmaq, çəkmək, oxuculara çatdırmaq idi.
Kursa daxil olan anda özünü gündəlik həyatın stresindən uzaq, pozitiv və öyrənməyə həvəs oyadan bir məkanda hiss edirsən: parlaq işıqlarlar, səliqəli sinif otaqları, gülərüz müəllim kollektivi və ən əsası öyrənmək üçün can atan tələbələr. Hər detal insanın öyrənməyə, oxumağa həvəsini oyadır. Burada təkcə ingilis dili deyil, həm də rus və alman dilləri, riyaziyyat fənni, o cümlədən beynəlxalq imtahanlara hazırlıq dərsləri tədris olunur.
Bu təhsil mərkəzinə qəbul olmaq istəyən şagirdlər əvvəlcə yoxlanış - test mərhələsindən keçir, nəticələrə uyğun olaraq öz səviyyələrinə uyğun qruplarda təhsil almağa başlayırlar.
Dərslər sadəcə informasiyanın ötürülməsi deyil həm də canlı, interaktiv bir prosesdir. Danışıq bacarıqları, dinləmə qabiliyyəti, qrammatika və lüğət öyrənilməsi bir-biri ilə əlaqələndirilmiş şəkildə tədris olunur. Müəllimlər dərsi oyunlarla, mahnılarla, yarışmalarla zənginləşdirərək şagirdlərin diqqətini, marağını daim fəal saxlamağa çalışırlar.
“Biz burada sadəcə dərs keçmirik”, – deyə kursun icraçı direktoru, təhsil eksperti Əzizə Fətullayeva bizimlə söhbətində vurğuladı: “Məqsədimiz tələbələrə dil öyrətməklə yanaşı, onların bu prosesi sevməsini təmin etməkdir”.
“Ingla School” maraqlı bir qayda tətbiq edib: Təhsilin burada standart bir formuluyoxdur, hər tələbənin fərdi ehtiyacları nəzərə alınır. Səviyyə üzrə dərs müddəti orta hesabla 3-4 ay çəkir, lakin tələbənin öyrənmə sürətindən asılı olaraq bu zaman dəyişə bilir. Kursun sonunda isə tələbələr əldə etdikləri nəticələrə uyğun olaraq sertifikatla qiymətləndirilirlər.
Ingla School Baku fərqlənməyi bacaran təşəbbüsləri ilə də seçilir. Məsələn, hər ayın 15-də təşkil olunan “Film Günü” artıq tələbələrin səbirsizliklə gözlədiyi ənənəyə çevrilib. Həmin gün keçirilən dərsdən sonra sinif bir kinoteatra çevrilir, birlikdə film izlənilir və dil bacarıqları kontekst daxilində inkişaf etdirilir. Belə təşəbbüslər həm şagirdlərin motivasiyasını artırır, həm də öyrənməni sinif divarlarının kənarına daşıyır.
Nəticə etibarilə, Ingla School Baku təkcə öyrədən yox, həm də ruhlandıran bir mühit yaradır. Burada dərs prosesi quru və sıradan deyil – canlı, maraqlı və şagirdin mərkəzdə olduğu bir yanaşma mövcuddur. Dil öyrənmək, savadını, biliyini artırmaq istəyənlər üçün bu, sadəcə bir kurs deyil, öyrənmənin zövqə çevrildiyi bir məkandır.
Fidan Xəlilova
Aydan Quliyeva
12:12 23.04.2025
Oxunuş sayı: 3451
