Dövlət Turizm Agentliyində nə baş verir? - ŞOK FAKTLAR
Azərbaycanda turizmin inkişafına dövlət səviyyəsində xüsusi diqqət ayrılır. Prezident İlham Əliyevin birbaşa iştirakı ilə böyük turizm kompleksləri yaradılır, regionlarda dövlətin dəstəyi ilə yeni turizm mərkəzləri istifadəyə verilir. Həmçinin, yerli turizmi təşviq etmək məqsədilə Prezident ailəsi ilə birlikdə ölkənin müxtəlif bölgələrinə səfərlər edir.
Xüsusilə Qarabağ müharibəsindən sonra azad olunmuş ərazilərdə genişmiqyaslı bərpa və yenidənqurma işləri həyata keçirilir. Şuşa, Laçın, Zəngilan və digər bölgələrdə tarixi irs qorunmaqla yanaşı, yeni turizm obyektləri inşa edilir. Prezident bu açılışlarda şəxsən iştirak edərək layihələrin əhəmiyyətini vurğulayır və bu bölgələrin təkcə iqtisadi deyil, eyni zamanda, mədəni dəyərinin də artırılmasına xüsusi önəm verir. Bütün bu addımlar Azərbaycanın beynəlxalq turizm xəritəsində daha rəqabətqabiliyyətli mövqeyə sahib olmasına yönəlib.
Lakin turizm sahəsində genişmiqyaslı inkişaf layihələri fonunda Dövlət Turizm Agentliyinin rəhbərliyinin fəaliyyəti ayrılan maliyyənin istifadəsi ilə bağlı, qalmaqallı layihələri ciddi suallar doğurur.
Son günlər Azərbaycan mediasında Dövlət Turizm Agentliyinin maliyyə fəaliyyəti ilə bağlı yeni qalmaqallı faktlar yayılıb. Məlum olub ki, 2025-ci ilin ilk iki ay yarımında Agentlik 13 milyon 243 min 703 manat xərcləyib. Bu müddət ərzində qurum ümumilikdə 13 tender elan edib və 43 satınalma müqaviləsi bağlayıb.
Crossmedia.az-ın məlumatına görə, MITT 2025 turizm sərgisi çərçivəsində sərgi stendinin qurulmasına 134 mindən çox manat, jurnalistlər, bloqçular və turizm şirkətləri üçün tanışlıq səfərlərinə isə 2 milyon manat ayrılıb. Turistlərin cəlb olunması məqsədilə Qazaxıstan və Özbəkistana hər biri üçün 500 mindən çox, Hindistan və Çinə isə 700 mindən çox vəsait xərclənib.
Bundan əlavə, ötən il Dövlət Turizm Agentliyinin təşkil etdiyi "Qərbi Azərbaycan mətbəxinin təqdimatı" tədbiri ilə bağlı qalmaqal yaranmışdı. Tədbirin ən çox müzakirə olunan məqamlarından biri 150 nəfərə 3 ton ərik arağının təqdim edilməsi olub. Bu isə adambaşına 20 litr araq deməkdir. Geniş tənqidlərdən sonra Agentlik bunu "texniki səhv" adlandırıb.
Maliyyə məsələləri ilə bağlı suallar doğuran digər layihə isə Xınalıq kəndindəki evlərin təmiri ilə bağlıdır. Məlumata görə, 44 evin təmiri üçün "Maqro Construction" şirkəti ilə 2,2 milyon manatlıq müqavilə bağlanıb. Bundan əvvəl isə eyni şirkətə 4,4 milyon manat ayrılıb. Ümumilikdə 6,6 milyon manatlıq müqavilələr əsasında hər bir evin təmirinin 150 min manatdan çox başa gəldiyi bildirilir ki, bu da Bakıda yeni mənzil qiymətinə bərabərdir.
Azərbaycan Milli Kulinariya Assosiasiyasının rəhbəri Tahir Əmiraslanov isə Agentliyin 2023-cü ildə WACS üçün 2,9 milyon manat mənimsədiyini iddia edib. Bundan əlavə, 2024-cü ildə Kulinariya Mərkəzinin təmirinə 700 min manat ayrıldığı bildirilir.
O bildirib ki, Agentlik Lüksemburqda yarışlara qatılıb, lakin nəticə əldə etməyib. Əmiraslanovun sözlərinə görə, "Mən işdən çıxan kimi, Fuad müəllim və komandası Discovery World Travel-ə məxsus mətbəximizin 7 nümunəsini ermənilərə bağışladılar".
Bütün bu qalmaqallı xərclər fonunda maraqlı məqam isə Dövlət Turizm Agentliyinin Transparency International təşkilatı ilə əməkdaşlıq etməsidir. Qeyd edək ki, bu təşkilat Azərbaycanda korrupsiyanın tədqiqi ilə məşğul olduğunu iddia edirdi və bir həftə əvvəl ölkədə fəaliyyətini dayandırıb.
Məsələ ilə bağlı Agentlikdən hələlik heç bir rəsmi açıqlama verilməyib.
Zeynəb Yunuszadə
18:43 13.03.2025
Oxunuş sayı: 10106
