Tramp süni intellekt şirkətlərinə xüsusi status verməyə hazırlaşır
ABŞ Prezidenti Donald Trampın administrasiyası Çinlə qlobal texnologiya rəqabətini gücləndirmək məqsədilə "Nvidia", "Amazon", "Microsoft", "OpenAI" və "Anthropic" daxil olmaqla 20-dən çox şirkətə süni intellekt sahəsində "milli çempion" statusu verməyi planlaşdırır.
Crossmedia.az xəbər verir ki, "The Wall Street Journal" (WSJ) bu barədə məlumat yayıb.
Nəşrin məlumatına görə, təşəbbüsün əsas məqsədi ABŞ şirkətlərinin xarici bazarlarda fəaliyyətini genişləndirmək və Çin texnologiyalarına alternativ olaraq Amerika istehsalı olan süni intellekt məhsullarının satışını artırmaqdır.
Yeni status əldə edən şirkətlər ixrac lisenziyalarının daha sürətli təsdiqlənməsi, xarici bazarlarda dövlət dəstəyi və federal maliyyələşmə imkanlarından yararlana biləcəklər.
Proqram çərçivəsində ABŞ istehsalı olan çiplərin, süni intellekt modellərinin və digər texnoloji məhsulların xarici hökumətlərə və şirkətlərə vahid paket şəklində təqdim edilməsi nəzərdə tutulur.
ABŞ-nin ticarət naziri Hovard Lutnikin təşəbbüsü bir həftə ərzində rəsmən açıqlayacağı gözlənilir. Bununla belə, elanın vaxtı dəyişə bilər.
Qeyd olunur ki, qərar "Nvidia" şirkətinin qabaqcıl çiplərinin Çinə ötürülməsi ilə bağlı təhlükəsizlik narahatlıqlarının artdığı dövrə təsadüf edir.
Vaşinqtonda bəzi siyasətçilər ABŞ texnologiyalarının Çin şirkətlərinin əlinə keçməsinin qarşısını almaq üçün ixrac nəzarətinin sərtləşdirilməsini tələb edirlər.
ABŞ administrasiyası isə bir tərəfdən süni intellekt texnologiyalarının beynəlxalq satışını genişləndirməyə, digər tərəfdən strateji çiplərin Çinə ötürülməsini məhdudlaşdırmağa çalışır.
Hələlik təşəbbüsün iştirakçı şirkətlərinin tam siyahısı və xüsusi statusun verilməsi ilə bağlı yekun qərar rəsmi şəkildə açıqlanmayıb.
10:38 16.11.2026
Oxunuş sayı: 106