Azərbaycanın nəqliyyat dəhlizləri ilə 26 milyon tona yaxın yük daşınıb
2026-cı ilin yanvar-sentyabr aylarında Azərbaycanın nəqliyyat dəhlizləri vasitəsilə ümumilikdə 25 milyon 942,4 min ton yük daşınıb.
Crossmedia.az xəbər verir ki, Dövlət Statistika Komitəsi bu barədə məlumat yayıb.
Hesabat dövründə dəmir yolu nəqliyyatı ilə 12 milyon 81,7 min ton, avtomobil nəqliyyatı ilə 8 milyon 490,6 min ton, dəniz nəqliyyatı ilə isə 5 milyon 370,1 min ton yük daşınıb.
Nəqliyyat dəhlizləri üzrə ən böyük yük həcmi Şərq-Qərb istiqamətində qeydə alınıb. Bu dəhlizlə 14 milyon 741,3 min ton yük daşınıb. Bunun 7 milyon 507,2 min tonu Avropa-Qafqaz-Asiya nəqliyyat dəhlizinin payına düşüb.
Şimal-Cənub nəqliyyat dəhlizi ilə 6 milyon 867,2 min ton, Şimal-Qərb dəhlizi ilə 3 milyon 886,9 min ton, Cənub-Qərb dəhlizi ilə isə 447 min ton yük daşınıb.
Statistikaya əsasən, dəmir yolu nəqliyyatı ilə daşınan yüklərin 47%-ni, avtomobil nəqliyyatı ilə daşınan yüklərin isə 46,6%-ni tranzit yüklər təşkil edib.
10:26 16.11.2026
Oxunuş sayı: 88