İrandan Azərbaycana narkotik daşıyan uçuş aparatı zərərsizləşdirilib
Azərbaycan-İran dövlət sərhədində narkotik vasitələrin qanunsuz daşınması üçün istifadə edilən uçuş aparatı zərərsizləşdirilib, 21 kiloqramdan çox narkotik vasitə və 4000 ədəd psixotrop tərkibli həb aşkarlanıb.
Crossmedia.az xəbər verir ki, Dövlət Sərhəd Xidmətinin Mətbuat xidməti bu barədə məlumat yayıb.
Bildirilib ki, Dövlət Sərhəd Xidmətinin Sərhəd Qoşunlarının "Göytəpə" sərhəd dəstəsinin xidməti ərazisində İran istiqamətindən Azərbaycanın dövlət sərhədini qanunsuz keçən "paratrike" tipli uçuş aparatı müşahidə edilib.
Keçirilən əməliyyat tədbirləri nəticəsində uçuş aparatı zərərsizləşdirilib, ümumi çəkisi 21 kiloqram 210 qram narkotik vasitə, o cümlədən 19 kiloqram 270 qram marixuana və 1 kiloqram 940 qram tiryək, həmçinin 4000 ədəd psixotrop tərkibli metadon M-40 həbi aşkar edilərək götürülüb.
Uçuş aparatını idarə edən İran vətəndaşı dövlət sərhədini qanunsuz keçməkdə şübhəli bilinərək saxlanılıb.
Dövlət Sərhəd Xidməti bildirib ki, əvvəllər də uçuş aparatlarından istifadə etməklə İrandan Azərbaycana narkotik vasitələrin qanunsuz keçirilməsi halları qeydə alınıb.
Qurum bu cür fəaliyyətlərin dövlət sərhədinin toxunulmazlığına və ölkənin təhlükəsizliyinə təhdid yaratdığını vurğulayıb.
Dövlət Sərhəd Xidməti sərhəddə qanunsuz fəaliyyətlərin qarşısının alınması və qaçaqmalçılıqla mübarizə tədbirlərinin davam etdiriləcəyini açıqlayıb.
10:11 16.11.2026
Oxunuş sayı: 97