Fransada irimiqyaslı kiberhücum: 22 milyon insanın məlumatları oğurlandı
Fransa poçt xidməti "La Poste"un törəmə şirkəti olan "Maileva"ya qarşı həyata keçirilən kiberhücum nəticəsində 22 milyon insanın fərdi məlumatlarının ələ keçirildiyi açıqlanıb.
Crossmedia.az xarici KİV-ə istinadən xəbər verir ki, sentyabr ayında baş vermiş hücumun miqyası iki ay sonra təsdiqlənib; oğurlanan hesablara, ilkin məlumatlara görə, ad və soyadlar, eləcə də poçt ünvanları daxildir.
Fransanın dövlət poçt xidməti olan "La Poste"a daxil olan "Docaposte" şirkətinin törəmə müəssisəsi – "Maileva" platforması kiberhücuma məruz qalıb.
Şirkətlər, xəstəxanalar və dövlət qurumları tərəfindən istifadə olunan bu platforma əməkhaqqı vərəqələri, hesab-fakturalar, sifarişli məktublar və rəsmi yazışmalar kimi sənədlərin göndərilməsini təmin edir.
"La Poste" tərəfindən yayılan bəyanatda bildirilib ki, hücum nəticəsində platforma vasitəsilə poçt göndərilmiş 22 milyon nəfərin məlumatları təhlükə altına düşüb. Vurğulanıb ki, həmin şəxslər "Maileva"nın birbaşa müştəriləri deyil, platformadan istifadə edən qurum və şirkətlər tərəfindən göndərilən yazışmaların ünvan sahibləridir.
Qeyd edək ki, hücumun arxasında kimin dayandığı hələ açıqlanmayıb.
19:49 15.11.2026
Oxunuş sayı: 137