Netanyahu İranla bağlı yeni hücum planını müzakirə edib
İsrailin müvəqqəti Baş naziri Benyamin Netanyahu İrana qarşı hərbi hücumların bərpası ehtimalını yeni hökuməti formalaşdırmaq tapşırığı alan Qadi Ayzenkotla müzakirə edib.
Crossmedia.az xəbər verir ki, "Anadolu" agentliyi bu barədə məlumat yayıb.
İsrailin "Channel 12" telekanalının məlumatına görə, noyabrın 12-də keçirilən görüşdə Netanyahu Ayzenkotla İranla bağlı kəşfiyyat məlumatlarını bölüşməyə çalışıb.
Bununla belə, Ayzenkotun İsrailin xarici kəşfiyyat xidməti "Mossad"ın rəhbəri Roman Qofmanın eyni məsələni müzakirə etmək üçün Vaşinqtona səfərindən xəbərsiz olduğu bildirilir.
Görüş İsraildə siyasi hakimiyyətin dəyişməsi fonunda baş tutub. Oktyabrın 27-də keçirilən parlament seçkilərində Netanyahu blokunun çoxluğu itirməsindən sonra Ayzenkota yeni hökuməti formalaşdırmaq tapşırılıb.
İsrailin KAN ictimai yayımçısının məlumatına əsasən, Baş Qərargah rəisi Eyal Zamir İrana qarşı hərbi əməliyyatların keçirilməsini dəstəkləsə də, hazırkı vaxtı bunun üçün münasib hesab etmir.
Hərbi rəhbərlik əməliyyatların ABŞ ilə koordinasiyalı şəkildə və əlverişli şəraitdə həyata keçirilməsinin tərəfdarıdır. Təhlükəsizlik mənbələri isə İrandan dərhal hərbi müdaxilə tələb edən təhlükənin olmadığını bildirirlər.
Digər tərəfdən, "Haaretz" qəzetinin məlumatına görə, "Mossad" rəhbəri Roman Qofman Vaşinqtonda ABŞ Mərkəzi Kəşfiyyat İdarəsinin direktoru Con Retkliff ilə görüşüb. Onun ABŞ prezidentinin xüsusi nümayəndəsi Stiv Uitkoffla da danışıqlar aparacağı gözlənilir.
Səfərin əsas məqsədinin İrana qarşı mümkün yeni hücumlarla bağlı Vaşinqtonun dəstəyini əldə etmək olduğu bildirilir.
İsrail mediasının məlumatına görə, Təl-Əviv ABŞ ilə İran arasında Tehranın nüvə və raket proqramlarını əhatə etməyən razılaşmanın əldə olunmasından narahatdır.
ABŞ və İsrail rəsmiləri səfərin detalları barədə rəsmi açıqlama verməyiblər.
14:53 14.11.2026
Oxunuş sayı: 142