Arda Gülərlə bağlı “Real Madrid”dən yeni müqavilə xəbəri
İspaniyanın “Real Madrid” klubu türkiyəli futbolçu Arda Gülərlə yeni müqavilə imzalamağa hazırlaşır. İddialara görə, gənc futbolçunun illik maaşı 8 milyon avroya yüksəldiləcək.
Crossmedia.az xəbər verir ki, İspaniyanın “El Debate” nəşri bu barədə məlumat yayıb.
Məlumata əsasən, tərəflər yeni müqavilə ilə bağlı prinsipial razılığa gəliblər. Madrid təmsilçisi 21 yaşlı futbolçu ilə 2031-ci ilədək qüvvədə olacaq müqavilə imzalamağı planlaşdırır.
Hazırda bonuslar nəzərə alınmadan illik 6 milyon 250 min avro qazandığı bildirilən Arda Gülərə yeni müqavilə çərçivəsində 8 milyon avro maaş təklif ediləcəyi iddia olunur.
Təklif qəbul edilərsə, futbolçunun həftəlik qazancı təxminən 153 min 846 avro, gündəlik gəliri isə 21 min 917 avro təşkil edəcək.
Bildirilir ki, “Real Madrid”in baş məşqçisi Joze Mourinyo Arda Güləri komandanın əsas futbolçularından biri hesab edir.
Portuqaliyalı mütəxəssisin klub rəhbərliyindən Arda Gülərlə yanaşı, Cud Bellinqem, Federiko Valverde və Orelyen Tçuameni ilə də müqavilələrin yenilənməsini istədiyi iddia edilir.
Qeyd edək ki, Arda Gülər 2023-cü ildə Türkiyənin “Fənərbağça” klubundan “Real Madrid”ə transfer olunub. Onun mövcud müqaviləsi 2029-cu ilin yayında başa çatır.
Yeni müqavilə və maaş məbləği ilə bağlı klubdan hələlik rəsmi açıqlama verilməyib.
13:27 14.11.2026
Oxunuş sayı: 42
