ABŞ-nin keçmiş vitse-prezidentindən İrana hərbi çağırış
ABŞ-nin keçmiş vitse-prezidenti Mayk Pens Prezident Donald Trampı İrana qarşı hərbi əməliyyatları yenidən genişləndirməyə çağırıb.
Crossmedia.az xəbər verir ki, “Fox News” telekanalı bu barədə məlumat yayıb.
Keçmiş vitse-prezident bildirib ki, ABŞ-də aralıq seçkilər başa çatdığından Tramp İranla bağlı daha sərt hərbi qərarlar qəbul etməlidir.
“Artıq aralıq seçkilər geridə qalıb. Tramp ABŞ və İsrail silahlı qüvvələrinə əməliyyatı sona çatdırmaq üçün sərbəst hərəkət imkanı verməlidir”, – deyə Pens vurğulayıb.
Onun fikrincə, ABŞ administrasiyası İrana qarşı hərbi əməliyyatları vaxtından əvvəl dayandırıb və qarşıya qoyulan məqsədlərə tam nail olmayıb.
Pens hesab edir ki, İranın nüvə və raket proqramları, eləcə də regiondakı fəaliyyəti ilə bağlı təhlükəsizlik məsələləri həll edilmədən hərbi təzyiqin azaldılması düzgün yanaşma deyil.
Keçmiş vitse-prezident ABŞ-nin hazırkı vitse-prezidenti Cey Di Vensin İranla bağlı mövqeyini də tənqid edib.
O, ABŞ-də keçirilmiş aralıq seçkilərin nəticələrinin yalnız İran müharibəsi və yanacaq qiymətləri ilə əlaqələndirilməsinin doğru olmadığını bildirib.
Qeyd edək ki, Pensin açıqlamaları onun şəxsi siyasi mövqeyini əks etdirir. ABŞ administrasiyası İrana qarşı yeni genişmiqyaslı hərbi əməliyyatın başlanması barədə qərar elan etməyib.
13:17 14.11.2026
Oxunuş sayı: 38
