Süni intellekt xidmətlərinin adından istifadə edən yeni fişinq kampaniyası aşkarlanıb
Süni intellekt xidmətlərinin adından istifadə etməklə istifadəçilərin hesab məlumatlarını ələ keçirməyə yönəlmiş yeni fişinq kampaniyası aşkarlanıb.
Crossmedia.az bu barədə Milli Kibertəhlükəsizlik Agentliyi (MKA) xəbərdarlıq yayıb.
Bildirilib ki, kampaniya çərçivəsində ChatGPT, Gemini, Claude, Perplexity, Meta Muse və Manus kimi tanınmış süni intellekt xidmətlərinin adından saxta reklam portalları yaradılıb. Həmin portallar istifadəçilərə reklam kampaniyalarının idarə edilməsi, reklam xərclərinin təhlili və biznes hesablarının xidmətlərə qoşulması kimi imkanlar təklif edir.
Əslində isə bu saytların əsas məqsədi istifadəçilərin giriş məlumatlarını və birdəfəlik təsdiq kodlarını ələ keçirməkdir. Hücum zamanı istifadəçilərə həqiqi giriş pəncərələrinə bənzəyən saxta interfeyslər təqdim olunur. Bu interfeyslər ayrıca brauzer pəncərəsi deyil, veb-səhifənin daxilində yaradılmış vizual elementlərdir.
İstifadəçi həmin pəncərəyə istifadəçi adını və parolunu daxil etdikdə məlumatlar hücumçulara ötürülür. Daha sonra birdəfəlik təsdiq kodu tələb edilərək hesaba giriş imkanının əldə olunmasına cəhd göstərilir. Beləliklə, çoxfaktorlu autentifikasiyadan istifadə edilməsi belə, istifadəçinin aldadıldığı hallarda hesabın ələ keçirilməsinin qarşısını tam almaya bilər.
Araşdırma zamanı kampaniyanın reklam hesablarının idarəçiləri, media alıcıları və reklam agentliklərinin əməkdaşları kimi konkret peşə qruplarını hədəf aldığı müəyyənləşib. Bu hesabların ələ keçirilməsi maliyyə itkilərinə, icazəsiz reklamların yayımlanmasına və hesabların qanuni sahibləri üçün idarəetmə imkanlarının məhdudlaşdırılmasına səbəb ola bilər.
Tədqiqatçılar eyni infrastrukturdan istifadə edən digər fişinq istiqamətlərini də müəyyənləşdiriblər. Bunlara Google Ads adından vəsaitin geri qaytarılmasını vəd edən saxta saytlar, eləcə də müxtəlif şirkətlərin adından yaradılmış saxta işə qəbul səhifələri daxildir. Müşahidələr kampaniyanın yayılmasında ödənişli internet reklamlarından da istifadə olunduğunu göstərir.
MKA istifadəçiləri aşağıdakı təhlükəsizlik qaydalarına əməl etməyə çağırır:
Süni intellekt xidmətlərini və digər rəqəmsal alətləri biznes hesablarına yalnız rəsmi saytlar və etibarlı inteqrasiya kanalları vasitəsilə qoşun.
Giriş pəncərəsinin daxilində göstərilən ünvana deyil, brauzerin öz ünvan sətrinə diqqət yetirin.
Şübhəli məktublardakı keçidlərə daxil olmayın və tanınmış şirkətlərin adından göndərilən dəvətləri yoxlamadan qəbul etməyin.
Birdəfəlik təsdiq kodlarını yalnız özünüz başladığınız giriş əməliyyatı zamanı daxil edin və heç kimlə paylaşmayın.
Bununla yanaşı, MKA mütəxəssisləri bildirirlər ki, istifadəçilər giriş məlumatlarını fişinq səhifəsinə daxil etdiklərindən şübhələnirlərsə, dərhal parollarını dəyişməli, aktiv sessiyaları dayandırmalı və hesabın administrator siyahısını yoxlamalıdırlar. Həmçinin hesabdakı icazələr, ödəniş məlumatları və son əməliyyatlar nəzərdən keçirilməlidir.
17:01 13.10.2026
Oxunuş sayı: 222
