Ukraynalı uşaqlar Qəbələdə reabilitasiya keçəcəklər
Ukraynadan daha 30 uşaq sosial-psixoloji reabilitasiya xidmətlərindən yararlanmaq üçün Azərbaycana gətirilib.
Crossmedia.az xəbər verir ki, Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyinin təşəbbüsü ilə gətirilən uşaqlar Qəbələ Uşaq Reabilitasiya Mərkəzində 10 gün ərzində tibbi və sosial-psixoloji dəstəklə təmin olunacaqlar.
Proqram uşaqların psixoloji vəziyyətinin yaxşılaşdırılması, sosiallaşması və asudə vaxtlarının səmərəli təşkili məqsədi daşıyır.
Reabilitasiya müddətində fərdi psixoloji konsultasiyalar, qrup terapiyaları, yoqa və rəqs terapiyası məşğələləri təşkil ediləcək. Uşaqlar, həmçinin müalicəvi masaj, hovuz və vannadan istifadə, art-terapiya və digər reabilitasiya xidmətlərindən yararlanacaqlar.
Bununla yanaşı, onların Qəbələ, Şəki və Şamaxı rayonlarının tarixi və görməli yerlərinə ekskursiyalarının təşkili nəzərdə tutulub.
Qeyd edək ki, Sosial Xidmətlər Agentliyi ötən dövrdə Ukraynadan 500-dən çox uşaq və gənci Azərbaycana gətirərək sosial-psixoloji reabilitasiya xidmətləri ilə təmin edib.
18:25 12.10.2026
Oxunuş sayı: 60
