Deputat: 3 Oktyabr Azərbaycanın siyasi tarixində dönüş nöqtəsidir
3 oktyabr Azərbaycanın müasir siyasi tarixində mühüm hadisələrlə yadda qalan tarixlərdən biridir. Bu tarix ölkənin dövlətçilik tarixində baş vermiş siyasi proseslərin, qəbul edilən qərarların və sonrakı ictimai-siyasi inkişafın xatırlanması baxımından xüsusi əhəmiyyət daşıyır. Tarixi hadisələrin mahiyyətinin və onların Azərbaycanın dövlətçilik yolundakı rolunun araşdırılması həmin dövrün siyasi irsinin daha dolğun dəyərləndirilməsinə imkan verir.
Crossmedia.az-a açıqlamasında Milli Məclisin deputatı Aydın Mirzəzadə 3 Oktyabr 1993-cü il tarixinin Azərbaycanın müasir tarixində mühüm hadisələrdən biri olduğunu və ölkənin yeni dövlətçilik mərhələsinin əsasını qoyduğunu bildirib:
“3 Oktyabr 1993-cü il Azərbaycan tarixinin mühüm hadisələrindən biridir. Bu gün Azərbaycan üçün yeni dövrün ilk addımlarının atıldığı tarixdir. 1993-cü ildə Ulu Öndər Heydər Əliyev 15 İyun tarixində böyük siyasi dönüşü ilə Azərbaycanda dövlətçiliyin böhranının qarşısını aldı. Azərbaycanın, Azərbaycan torpaqlarının Ermənistan tərəfindən sürətlə işğalının qarşısını aldı və Azərbaycana bir ümid verdi. Bundan sonra mərhələ-mərhələ dövlətçilik strukturu formalaşmağa başladı”.
Deputat həmin ilin 3 oktyabrında keçirilən prezident seçkilərinin də ölkənin siyasi inkişafında mühüm mərhələ olduğunu qeyd edib: “3 Oktyabr, həmin ilin 3 oktyabrında keçirilən prezident seçkilərində Ulu Öndər böyük səs çoxluğu ilə qalib gəldi. O, xalq tərəfindən verilən siyasi mandata əsaslanaraq Azərbaycan cəmiyyətində sabitliyin, dövlətə inamın və dövlətin xalqın maraqlarının qorunmasında mexanizm olmasının əsaslarını formalaşdırdı”.
Aydın Mirzəzadə bildirib ki, sonrakı proseslər Heydər Əliyevin siyasi kursunun ölkənin inkişafında mühüm rol oynadığını göstərib: “Sonrakı proseslər, müasir tarix sübut etdi ki, Azərbaycan xalqı düzgün seçim etmişdi. Ulu Öndər Heydər Əliyevə siyasi mandatın verilməsi qısa zamanda öz nəticəsini göstərdi. Cəbhə xəttində ciddi dəyişikliklər oldu. Atəşkəs haqqında saziş imzalandı və ondan sonra hüquqi, iqtisadi sahədə islahatlar keçirilərək bugünkü Azərbaycanın əsası qoyuldu”.
Deputat Azərbaycanın hazırkı inkişafında Heydər Əliyevin siyasi kursunun davam etdirilməsini də xüsusi vurğulayıb: “Bu gün də cənab Prezidentin Ulu Öndər Heydər Əliyevin siyasi kursunu davam etdirməsi Azərbaycanın bundan sonra da tarixi qələbələr qazanması üçün ciddi əsas rolunu oynayır”.
Nigar Xəlilli
20:00 02.10.2026
Oxunuş sayı: 50
