HƏMAS mühafizəçisi Britaniya vətəndaşı oldu, hücum planında şübhəli bilinir
HƏMAS-ın keçmiş lideri İsmayıl Haniyənin mühafizəçisi olmuş və sonradan Böyük Britaniya vətəndaşlığı almış şəxs Avropada yəhudilərə və İsraillə əlaqəli hədəflərə hücum hazırlamaqda şübhəli bilinir.
Crossmedia.az xəbər verir ki, “The Times” bu barədə məlumat yayıb.
Məhkəmə sənədlərində adı hüquqi səbəblərdən açıqlanmayan şəxs “Cənab X” kimi göstərilir. O, ən azı 2006-cı ildən Haniyənin şəxsi mühafizə dəstəsində xidmət edib.
Məlumata görə, 2009-2012-ci illərdə Avropa ilə Qəzza arasında Misir üzərindən mütəmadi səfərlər edən şəxs 2015-ci ildə Böyük Britaniyadan sığınacaq istəyib. Daha sonra ona ölkədə daimi yaşamaq hüququ verilib və o, sonradan Britaniya vətəndaşlığı əldə edib.
“The Times” yazır ki, keçmiş mühafizəçi İngiltərənin böyük şəhərlərindən birinin ətrafında İT məsləhətçisi kimi yaşayıb və HƏMAS-la əlaqələrini gizlədib.
Almaniya istintaqının məlumatına görə, o, 2025-ci ilin yayından etibarən Almaniya və ya Avstriyada yəhudi icma mərkəzlərinə, İsrail diplomatlarına və İsraili dəstəkləyən tədbirlərə hücumların hazırlanmasında iştirak edib. Mənbə onu planın əsas fiqurlarından biri kimi təqdim edib.
Şəxs 2025-ci ilin noyabrında Londonda saxlanılıb. Almaniya tərəfi onun ekstradisiyasını tələb edir.
Qəzetin məlumatına görə, şübhəli HƏMAS-ın yüksək vəzifəli nümayəndəsinin oğludur. Britaniya təhlükəsizlik xidmətlərinin onun HƏMAS rəhbərliyi ilə əlaqələrindən xəbərdar olduğu, lakin ölkədə olduğu dövrdə onun prioritet hədəf hesab edilmədiyi bildirilir.
Xatırladaq ki, J7 ölkələrində 2025-ci ildə antisemitizm xarakterli insidentlərin ümumi sayı 2022-ci illə müqayisədə 136 faiz, zorakılıqla müşayiət olunan insidentlərin sayı isə 97 faiz artıb.
22:20 27.09.2026
Oxunuş sayı: 41
