Rəqəmsal rublda ilk problemlər: Nabiullinadan açıqlama
Rusiyada geniş istifadəsinə başlanılan rəqəmsal rubl sistemində bir sıra texniki problemlər və istifadəçi çətinlikləri müşahidə olunur.
Crossmedia.az xəbər verir ki, bunu Rusiya Mərkəzi Bankının sədri Elvira Nabiullina Sankt-Peterburqda keçirilən XXIII Beynəlxalq Bank Forumunda bildirib.
Nabiullina rəqəmsal rublun tətbiqi prosesində bəzi texniki çatışmazlıqların qaldığını və müştərilərin sistemi hər zaman tam başa düşmədiyini deyib.
“Bəzi pürüzlər və texniki problemlər var. Müştərilər də sistemi hər zaman tam anlamırlar. İstifadəçi təcrübəsinin təkmilləşdirilməsinə ehtiyac var. Bu miqyasda layihələr üçün belə hallar təbiidir”, – deyə o bildirib.
Mərkəzi Bank rəhbərinin sözlərinə görə, layihədə iştirak edən banklar yaranan problemlərin operativ həlli üçün tənzimləyici ilə birgə işləyirlər. Nabiullina həmçinin rəqəmsal rubl cüzdanlarında böyük məbləğdə vəsaitlərin saxlanılmasının Mərkəzi Bankın əsas məqsədi olmadığını vurğulayıb.
Qeyd edək ki, Rusiyada rəqəmsal rublun geniş tətbiqinin yeni mərhələsi 1 sentyabr 2026-cı ildən başlayıb. Bu tarixdən etibarən ölkənin iri bankları müştərilərinə rəqəmsal rubl hesabı açmaq, pul köçürmək, eləcə də mal və xidmətlər üçün ödəniş etmək imkanı təqdim etməlidir.
Rusiya Mərkəzi Bankı tərəfindən emissiya olunan rəqəmsal rubl kriptovalyuta hesab edilmir. O, nağd və bank hesablarındakı rublla yanaşı, milli valyutanın üçüncü formasıdır və adi rublla eyni nominal dəyərə malikdir.
Rusiya həmçinin gələcəkdə rəqəmsal rublun digər ölkələrin mərkəzi bank rəqəmsal valyuta sistemləri ilə inteqrasiyası imkanlarını araşdırır. Bu istiqamətdə əsas məqsədlərdən biri beynəlxalq ödənişlərdə vasitəçilərdən asılılığın və əməliyyat xərclərinin azaldılmasıdır.
Avropa İttifaqı isə 23 aprel 2026-cı ildə qəbul etdiyi 20-ci sanksiyalar paketi çərçivəsində rəqəmsal rublla bağlı əməliyyat və dəstəyə məhdudiyyətlər tətbiq edib.
15:57 24.09.2026
Oxunuş sayı: 41
