"Powerbank"nız hər an partlaya bilər - diqqətli olun
"Powerbank"lar bir çox hallarda insanlara lazım olur, xüsusən də gün ərzində işdə olan, işi daha çox telefonda olan şəxslər üçün əlverişlidir. Lakin əlverişli olması ilə yanaşı insan sağlamlığı üçün də ciddi problemlər yarada bilir. "Powerbank" partlayışları son zamanlar gündəmdədir. Xüsusən stilist Anar Ağakişiyevdə də eyni hadisənin baş verməsi və bunu paylaşması insanlarda "powerbank"dan istifadədə ciddi narahatlıq doğurub. Maraqlıdır ki, bu partlamaların baş verməməsi üçün nələrə diqqət edilməlidir?
Mövzu ilə bağlı Crossmedia.az-a açıqlama verən telefon ustası Azər Ağayev qeyd edib ki, "powerbank"dan istifadə zamanı xüsusi və mürəkkəb qaydalar olmasa da, təhlükəsizlik baxımından bəzi vacib məqamlara əməl etmək lazımdır: "Cihazı uzun müddət elektrik yuvasına qoşulu vəziyyətdə saxlamaq düzgün deyil. Xüsusilə də "powerbank"ı gecə saatlarında enerji yığımına qoyaraq səhərə qədər cərəyan altında saxlamaq tövsiyə edilmir. Bu, batareyanın həddindən artıq qızmasına, daxili elementlərin deformasiyaya uğramasına və şişməsinə səbəb ola bilər. Nəticədə isə cihazda qısaqapanma, tüstülənmə, hətta yanğın və partlayış riski yarana bilər. Əgər "powerbank"ın korpusunda şişmə, həddindən artıq qızma, kəskin qoxu və ya digər nasazlıq əlamətləri müşahidə olunarsa, ondan istifadə dərhal dayandırılmalıdır. Belə hallarda cihazı özbaşına açmağa və ya istifadə etməyə davam etmək təhlükəlidir. "Powerbank" mütləq ixtisaslı ustaya göstərilməli və təmirə yararlı olub-olmaması müəyyənləşdirilməlidir. Təmiri mümkün olmayan və şişmiş vəziyyətdə olan powerbankın evdə saxlanılması belə təhlükə yarada bilər. Buna görə də belə cihazlar təhlükəsizlik qaydalarına uyğun şəkildə utilizasiya edilməlidir.
Usta qeyd edib ki, "powerbank" alarkən də qiymətdən daha çox keyfiyyətə üstünlük verilməsi vacibdir: "Mənşəyi məlum olmayan, sertifikatsız və həddindən artıq ucuz məhsulların batareyaları adətən daha keyfiyyətsiz olur. Bu cür cihazlar qısa müddətdə sıradan çıxa, enerji saxlama qabiliyyətini itirə və istifadə zamanı daha böyük təhlükə yarada bilər. Buna görə də etibarlı istehsalçıların məhsullarına üstünlük vermək, sertifikatlı və zəmanətli powerbank seçmək həm cihazın uzunömürlü olması, həm də istifadəçinin təhlükəsizliyi baxımından ən doğru seçim hesab olunur".
Ayhan
17:30 07.08.2026
Oxunuş sayı: 40
