77 yaşlı milyarderin bir paylaşımı interneti silkələdi: 11,5 milyon baxış
LVMH konqlomeratının rəhbəri və Avropanın ən varlı şəxsi Bernar Arno son 12 il ərzində ictimai imicini dəyişməyə çalışıb.
Crossmedia.az xəbər verir ki, “The New York Times” yazır ki, soyuq, amansız və sirli kimi xarakterizə olunan 77 yaşlı milyarderin bu məqsədinə sosial şəbəkədəki bir paylaşımı ilə nail olduğu görünür.
Dior, Louis Vuitton və Tiffany kimi lüks brendlərin sahibi olan Arno Parisdəki Fondation Louis Vuitton muzeyinə yüz milyonlarla dollar xərcləyib, 2024-cü il Olimpiya Oyunlarına sponsorluq edib, ödədiyi vergiləri və yaratdığı yüz minlərlə iş yerini ön plana çıxarıb. O, hətta nadir hallarda müsahibələr də verib. Lakin bütün bunlar onun ictimai obrazına ciddi təsir göstərməyib.
Arnonun adı mediada hələ də kaşmir içində canavar, Terminator və maliyyənin Makiavellisi kimi ifadələrlə hallanıb.
Vəziyyəti dəyişən hadisə isə LVMH-nin “X” sosial şəbəkəsində yayımladığı Təşəkkür edirəm başlıqlı üçsəhifəlik ironik açıq məktub olub. Məktub “Le Monde” qəzetinin Arno ailəsi, onun beş övladı, hakimiyyətin ötürülməsi planları, siyasətçilərlə əlaqələri və biznes strategiyasına həsr olunmuş geniş araşdırmasına cavab olaraq hazırlanıb.
Arno jurnalistləri səhvlərə yol verməkdə ittiham etmək əvəzinə, araşdırmada ifşaedici fakt kimi təqdim olunan bəzi detalları yumorla qarşılayıb. Beləliklə, əvvəllər qalmaqal yarada biləcək məlumatlar gülüş mövzusuna çevrilib və Arnonun ictimai obrazında əvvəllər çox görünməyən bir xüsusiyyət — yumor hissi ön plana çıxıb.
Paylaşım qısa müddətdə milyonlarla baxış toplayıb. Arnonun bu addımı milyarder investor Bill Akman, britaniyalı siyasətçi Nadhim Zahavi və mədəniyyət tənqidçisi Lui Pizano da daxil olmaqla müxtəlif şəxslər tərəfindən müsbət qarşılanıb. Məktub biznes və moda dünyasının nümayəndələri arasında geniş rezonans doğurub.
Bundan sonra Arno daha bir gözlənilməz addım atıb. O, iyulun 27-də, 77 yaşında ilk dəfə şəxsi “X” hesabını yaradıb və məktubuna dəstək verənlərə təşəkkür edib.
Onun ilk şəxsi paylaşımı artıq 11,5 milyondan çox baxış toplayıb.
Bernar Arnonun böyük oğlu və LVMH-nin imic üzrə direktoru Antuan Arnonun sözlərinə görə, həm məktubun yazılması, həm də sosial şəbəkədə şəxsi hesab yaradılması ideyası birbaşa atasına məxsus olub.
Bu addım mediada tənqidlərə, demək olar ki, heç vaxt reaksiya verməyən Arnonun əvvəlki strategiyasından ciddi dönüş kimi qiymətləndirilir.
Ekspertlərin fikrincə, Arnonun davranışı lüks sənayesi üçün də müəyyən mesaj daşıyır. Sirr, sərt nəzarət və ictimaiyyətlə məsafə üzərində qurulan imicin müasir sosial media dövründə əvvəlki qədər effektiv olmadığı bildirilir.
Özünə gülə bilməsi Arnonu daha əlçatan və insani göstərib. Lüks bazarında satışların zəiflədiyi və sektora qarşı narazılığın artdığı bir vaxtda onun yeni ünsiyyət tərzi digər brendlər üçün də nümunə ola bilər.
08:50 02.08.2026
Oxunuş sayı: 82
