Baş nazirin müavini: Slovakiya Qarabağın bərpasında əməkdaşlığı genişləndirmək niyyətindədir
Azərbaycan Slovakiya üçün mühüm tərəfdaşdır və Avropanı Cənubi Qafqaz və Mərkəzi Asiya ilə birləşdirən əsas körpülərdən biridir.
Crossmedia.az xəbər verir ki, bu barədə Slovakiyanın Baş nazirinin müavini, iqtisadiyyat naziri Denisa Sakova Bakıda keçirilən Azərbaycan-Slovakiya biznes forumunda çıxışı zamanı bildirib.
Onun sözlərinə görə, müasir geosiyasi şəraitdə dayanıqlı təchizat zəncirləri, səmərəli nəqliyyat dəhlizləri və etibarlı enerji təminatı strateji prioritetlərə çevrilib:
"Azərbaycan təkcə etibarlı enerji tərəfdaşı kimi deyil, həm də regionları və bazarları birləşdirən mühüm logistika mərkəzi kimi getdikcə daha mühüm rol oynayır. Enerji sahəsi iqtisadi əməkdaşlığımızın əsas sütunlarından biri olaraq qalır. Təbii qaz mənbələrinin və nəqli marşrutlarının şaxələndirilməsi həm Slovakiya, həm də Avropa üçün mühüm əhəmiyyət daşıyır və biz Azərbaycanın regionumuzun enerji təhlükəsizliyinin möhkəmləndirilməsinə verdiyi töhfəni yüksək qiymətləndiririk".
O qeyd edib ki, ölkələr arasında əməkdaşlıq enerji sektoru ilə məhdudlaşmır:
"Slovakiya şirkətləri artıq Azərbaycanın modernləşdirilməsi prosesinə töhfə verirlər və biz Qarabağın bərpasında iştirak etmək imkanını yüksək qiymətləndiririk. Qərvənd kəndində həyata keçirilən "Ağıllı kənd" layihəsi Slovakiya texnologiyaları və təcrübəsinin insanların həyatını yaxşılaşdıran praktik həllər təqdim edə bildiyinin bariz nümunəsidir. Biz infrastruktur, rəqəmsallaşma, sənaye istehsalı, su təsərrüfatı və qabaqcıl texnologiyalar sahələrində də böyük əməkdaşlıq imkanları görürük. Slovakiya güclü mühəndislik ənənələrinə, yüksək ixtisaslı işçi qüvvəsinə və artan innovasiya potensialına malik müasir sənaye ölkəsidir. Şirkətlərimiz yüksək əlavə dəyər yaradan həllər təklif edir və Azərbaycanın gələcək inkişafında etibarlı tərəfdaş olmağa hazırdır".
12:53 15.07.2026
Oxunuş sayı: 51
