“Qəhrəmanlıq zirvəsi” kitabı oxuculara təqdim olunub
Müharibə, Əmək və Silahlı Qüvvələr Veteranları Təşkilatının qərargahında “Qəhrəmanlıq zirvəsi” adlı kitabın oxuculara təqdimatı reallaşıb.
Crossmedia.az xəbər verir ki, əsərin müəllifi “Modern İnkişaf və Ailə” İctimai Birliyinə rəhbərlik edən, həmçinin YAP Veteranlar Şurasında təmsil olunan Zərifə Quliyeva, nəşrin redaktoru və ön söz müəllifi isə tanınmış mətbuat nümayəndəsi Əliqismət Bədəlovdur.
Mərasim ölkəmizin Dövlət Himninin oxunması ilə açıq elan edilib. Ardınca müasir Azərbaycan dövlətinin qurucusu Heydər Əliyevin və torpaqlarımızın azadlığı naminə canlarını fəda etmiş müqəddəs şəhidlərimizin xatirəsi bir dəqiqəlik sükutla anılıb. Proqramın davamında Ulu Öndərin ömür yolu ilə siyasi irsini əks etdirən videoçarx nümayiş etdirilib, habelə Zərifə Quliyevanın qələmə aldığı şeir mətni əsasında ərsəyə gələn “Azərbaycan bayrağı” adlı musiqili kompozisiya dinlənilib.
Yığıncaqda çıxış edən millət vəkili Vüqar İsgəndərov, Vətən Müharibəsi Qəhrəmanı Zaur Hüseynov, professor Rəna Mirzəzadə, Azərbaycan Deflimpiya Komitəsinin Baş katibi Namiq Novruzov, polkovnik Cəlil Xəlilov, filologiya elmləri üzrə fəlsəfə doktoru, yazıçı-publisist Şərəf Cəlilli, Türk Ağsaqqalları Birliyinin rəhbəri, akademik Sudeyf İmamverdiyev, eləcə də şəhid valideynləri qazanılan tarixi zəfərdə döyüşçülərimizin göstərdiyi müstəsna rəşadəti önə çəkiblər. Natiqlər yeni işıq üzü görən kitab barədə müsbət rəylərini bildirərək, bu qəbildən olan topluların hərbi tariximizin gələcək nəsillərə ötürülməsindəki rolunu yüksək qiymətləndiriblər.
Vurğulanıb ki, “Qəhrəmanlıq zirvəsi” toplusu ölkəmizin hərb salnaməsinin geniş kütləyə çatdırılması və milli qəhrəmanlarımızın tanıdılması yönündə olduqca əhəmiyyətli mənbədir. Nəşrdə 44 günlük xalq savaşından, şəhidlərimizin döyüş meydanlarında göstərdiyi misilsiz hünərdən və onlara yönələn dövlət qayğısından ətraflı bəhs olunur. Kitabda yer alan faktlar yeniyetmələrin və gənc nəslin milli-mənəvi dəyərlər, vətənə sevgi ruhunda formalaşması üçün olduqca faydalıdır.
Ordumuzun göstərdiyi şücaətlərin kitabda parlaq boyalarla təsvir edilməsi, şanlı hərb keçmişimizə verilən böyük dəyərin və sonsuz ehtiramın bariz nümunəsidir.
Tədbirin yekununda şəhid doğmalarına və müharibə qazilərinə yeni kitablar paylanılıb, sonda xatirə fotosu çəkdirilib.
11:26 11.06.2026
Oxunuş sayı: 56
