Bakı-Tehran xəttində nə dəyişir? - Səfirliyin açılması münasibətləri dəyişəcəkmi?
Azərbaycanın xarici siyasətində mühüm addımlardan biri atılaraq Azərbaycan Respublikasının İran İslam Respublikasındakı Səfirliyi fəaliyyətini yenidən bərpa edib.
Azərbaycan Xarici İşlər Nazirliyi tərəfindən verilən məlumata görə, səfirlik ilkin mərhələdə məhdud sayda diplomatik və inzibati heyətlə fəaliyyət göstərəcək və təhlükəsizlik məsələləri nəzərə alınaraq proses mərhələli şəkildə həyata keçiriləcək.
Səfirliyin fəaliyyətinin bərpası bölgədə gərginliyin azalması fonunda baş verir və bu addım Azərbaycanın İran İslam Respublikası ilə münasibətlərə verdiyi əhəmiyyətin göstəricisi kimi qiymətləndirilir.
Rəsmi Bakı bununla yanaşı, regionda sülh və sabitliyin təmin olunmasına yönəlmiş təşəbbüsləri dəstəklədiyini bir daha nümayiş etdirir".
Məsələ ilə bağlı Milli Məclisin deputatı Musa Quliyev Crossmedia.az-la öz fikirlərini bölüşüb:
"Azərbaycan xalqı tarixən İranla əməkdaşlığın tərəfdarı olmuşdur. İranla bizi birləşdirən dərin tarixi qonşuluq münasibətləri, dini və mədəni yaxınlıqlar, eyni zamanda ortaq tarixi köklər mövcuddur.
Digər tərəfdən, İranda 30 milyondan çox azərbaycanlı yaşayır ki, bu da ölkələrimiz arasında münasibətləri daha da xüsusi və həssas edir.
Bu baxımdan, Azərbaycan-İran əlaqələri təkcə siyasi deyil, həm də taleyüklü bağlar kimi dəyərləndirilə bilər.
Lakin təəssüf ki, İran hakimiyyəti tərəfindən zaman-zaman bu münasibətlərin gərginləşməsinə səbəb olan, düzgün hesab edilməyən siyasi xətt müşahidə olunmuşdur.
İran Azərbaycanın ərazi bütövlüyünü rəsmi şəkildə tanısa da, 30 ilə yaxın müddətdə işğalçı Ermənistana müəyyən dəstəyin verilməsi Azərbaycan cəmiyyətində haqlı suallar doğurmuşdur.
Eyni zamanda, İranın siyasətində Azərbaycana qarşı ikili yanaşma elementlərinin olduğu da müxtəlif dövrlərdə müşahidə edilmişdir.
Arzumuz ondan ibarətdir ki, bu cür hallar gələcəkdə təkrarlanmasın və münasibətlər qarşılıqlı hörmət və bərabərlik prinsipləri üzərində inkişaf etsin.
Bununla belə, Azərbaycan hər zaman İranla dostluq və qonşuluq münasibətlərinin qorunmasına xüsusi önəm vermişdir.
Son dövrlərdə yüksək səviyyəli qarşılıqlı səfərlər və görüşlər, eləcə də baş verən hadisələr fonunda verilən başsağlıqları və göstərilən diplomatik jestlər tərəflərin münasibətləri normallaşdırmaq və əməkdaşlığı inkişaf etdirmək niyyətini nümayiş etdirir.
Azərbaycan tərəfi hər zaman regionda sülhün və sabitliyin qorunmasının tərəfdarı olmuş, qarşılıqlı humanitar və diplomatik jestləri müsbət qiymətləndirmişdir.
Hətta regional gərginliklər zamanı zərər çəkən mülki əhaliyə humanitar yardım göstərilməsi də bu yanaşmanın tərkib hissəsi olmuşdur.
Ümumilikdə, Azərbaycan tərəfi hesab edir ki, münasibətlər qonşuluq, qarşılıqlı hörmət və əməkdaşlıq prinsipləri əsasında inkişaf etməlidir. Sərhəd-keçid və təmasların genişlənməsi də bu münasibətlərin daha da möhkəmlənməsinə xidmət edən müsbət addımlardan biri kimi dəyərləndirilir".
Elmir Heydərli
15:10 15.04.2026
Oxunuş sayı: 928
