Yaxın Şərq
Netanyahu üçün yeganə çıxış yolu: İranla hərbi gərginlik təkrar seçkilərin taleyini həll edə bilər
İsraildə keçirilən növbədənkənar parlament seçkilərindən sonra xüsusi bülletenlərin sayılması başa çatsa da, ölkədəki dərin siyasi böhran və parlament dalanı daha da kəskinləşib. Son nəticələrə əsasən, Baş nazir Benyamin Netanyahunun rəhbərlik etdiyi Likud partiyası ultraortodoks müttəfiqi "Şas"ın hesabına mandat sayını 26-ya çatdırsa da, hakim blokun ümumi yeri 53-də qalıb. Müxalifət blokunun 48 mandat aldığı və ərəb partiyalarının rekord sayda – 19 mandat qazandığı 120 yerlik Knessetdə hökumət formalaşdırmaq üçün tələb olunan 61 nəfərlik səs çoxluğunu toplamaq hər iki tərəf üçün imkansız görünür. Ərəb partiyalarına qarşı "Qətərdən qanunsuz maliyyələşmə" ittihamlarının irəli sürülməsi isə koalisiya imkanlarını tamamilə sıfırlayır.
İsraildəki siyasi vəziyyəti, Qətər amilinin daxili siyasətə təsirini və gələcək ssenariləri Crossmedia.az-a professor Əlimusa İbrahimov şərh edib:
"İsraildə keçirilən seçkilər iki əsas siyasi blokdan heç birinin müstəqil şəkildə həll edə bilmədiyi ciddi siyasi dalanla nəticələnib. Baş nazir Benyamin Netanyahunun hakim bloku 53 mandat, müxalifət bloku 48 mandat, ərəb partiyaları isə rekord sayılan 19 mandat əldə edib. 120 deputatdan ibarət Knessetdə hökumət formalaşdırmaq üçün 61 mandat tələb olunur. Beləliklə, tərəflərdən heç biri hökumət qurmaq üçün lazımi səs çoxluğuna malik deyil və koalisiya yaratmaq imkanları genişlənmək əvəzinə getdikcə məhdudlaşır".
Politoloq ərəb partiyaları ətrafında alovlanan qalmaqalın müxalifətin manevr imkanlarını tamamilə blokladığını diqqətə çatdırıb:
"Seçkilərdən sonra ərəb partiyalarına qarşı xaricdən, xüsusilə Qətərdən maliyyələşmə yolu ilə seçkilərə qanunsuz müdaxilə iddiaları irəli sürüldü. Hətmə Mərkəzi Seçki Komissiyası və Şin Bet bu məsələni araşdırmağa başlayıb. Bu ittihamların sübut olunub-olunmamasından asılı olmayaraq, onların siyasi funksiyası aydındır: ərəb partiyalarının əldə etdiyi 19 mandatın legitimliyini şübhə altına almaq və Qadi Ayzenkot kimi müxalifət liderlərinin həmin partiyalarla əməkdaşlıq etmək imkanlarını sıfırlamaq. Ərəb partiyalarının dəstəyinə arxalanan koalisiya yaradılması müxalifət üçün böyük siyasi riskə çevrilib".
Əlimusa İbrahimov yaradılmış vəziyyətdən ən real çıxış yolunu və Netanyahunun gözlənilən hərbi-siyasi həmləsini vurğulayaraq fikrini yekunlaşdırıb:
"Milli birlik hökumətinin qurulması və ya müxalifətin parçalanması ssenariləri də Ayzenkotla Netanyahu arasındakı kəskin fikir ayrılıqlarına görə inandırıcı görünmür. Mövzu daxilində ən real ssenari İsraildə növbəti parlament seçkilərinin keçirilməsidir. Bu baxımdan, ABŞ-ın İrana qarşı ehtimal edilən hərbi əməliyyatları fonunda Netanyahu yaranmış təhlükəsizlik böhranından öz siyasi mövqelərini gücləndirmək üçün istifadə edə bilər. Təhlükəsizlik böhranları, bir qayda olaraq, seçicilərin hakimiyyətdə olan lider ətrafında birləşməsinə şərait yaradır və bu fakt təkrar seçkilərdə Netanyahunun xeyrinə həlledici rol oynaya bilər".
Zeynəb Həsən
21:15 30.10.2026
Oxunuş sayı: 59
