Cəmiyyət
Deputat: Ermənistanın bəyannaməsində Türkiyə əraziləri Qərbi Ermənistan adlandırılır
Ermənistanın Baş naziri Nikol Paşinyanın ölkənin 1990-cı il Müstəqillik Bəyannaməsinin mətnini açıq şəkildə "dövlət əleyhinə" adlandırması və bu sənədlə müstəqil dövlətin mövcudluğunun imkansızlığını bəyan etməsi İrəvandakı hüquqi-siyasi böhranın kəskinliyini göstərir. Paşinyanın tezliklə yeni Konstitusiya layihəsini ictimaiyyətə təqdim edəcəyini açıqlaması Azərbaycan-Ermənistan sülh prosesi baxımından strateji əhəmiyyət kəsb edir. Çünki mövcud Bəyannamədə Azərbaycanın Qarabağ bölgəsinin Ermənistana birləşdirilməsi və Türkiyəyə qarşı ərazi iddiaları yer alır ki, bu da sülh müqaviləsinin imzalanması qarşısında əsas hüquqi maneədir.
Ermənistan Müstəqillik Bəyannaməsinin beynəlxalq hüquqa zidd tərəflərini, Paşinyanın yeni Konstitusiya reformatorluğunun pərdəarxası məqamlarını və kilsə-diaspor qarşıdurmasını Crossmedia.az-a Milli Məclisin deputatı Elçin Mirzəbəyli şərh edib:
"Nikol Paşinyanın hansı məqsədlə deməsindən asılı olmayaraq, ölkənin Müstəqillik Bəyannaməsinin mətninin dövlətin əleyhinə olduğunu vurğulaması reallığı əks etdirir. Dünyada elə bir dövlət yoxdur ki, onun Müstəqillik Bəyannaməsində başqa dövlətlərə ərazi iddiaları irəli sürülsün, həm də həmin dövlətin ərazisinin ilhaq edilməsi vəsvəsə kimi dövlətin və xalqın qarşısında qoyulsun. Ermənistanın Müstəqillik Bəyannaməsində isə iki belə fakt var. Birincisi, Azərbaycan torpaqlarının Ermənistana birləşdirilməsi iddiası ilə bağlı qondarma şuranın və Ermənistan Ali Sovetinin birgə qərarına istinad edilməsidir. İkincisi isə Türkiyə ərazilərinin “Qərbi Ermənistan” adlandırılmasıdır".
Deputat bu iddiaların beynəlxalq hüquq normalarını birbaşa tapdaladığını və Paşinyanın daxili siyasi hesablamalarını diqqətə çatdırıb:
"Bütün bu faktorlar beynəlxalq hüququn norma və prinsiplərinə, eləcə də BMT Nizamnaməsinə tamamilə ziddir. Çünki ərazi işğalı ilə təhdid suverenliyə müdaxilə kimi qiymətləndirilir. Digər tərəfdən, Paşinyanın yeni Konstitusiya ilə məqsədi yalnız preambula hissəsindən bu istinadın çıxarılması deyil. O, həm də özünə qarşı çıxan revanşist müxalifətin, kilsənin və diasporun təsirini neytrallaşdırmaq istəyir. Mövcud Konstitusiyanın 18 və 19-cu maddələri kilsə ilə diasporun daxili siyasətə müdaxiləsinə hüquqi şərait yaradır. Paşinyana qarşı ən sərt mövqe tutan da məhz bu iki təsisatdır. Paşinyan gündəliyində bu məsələni çox qabartmasa da, yeni Konstitusiya ilə onların da statusunu məhdudlaşdırmağa çalışır".
Zeynəb Həsən
20:45 30.10.2026
Oxunuş sayı: 63
