Cənubi Qafqaz
4 min azərbaycanlı itkindir – Ermənistan məzarlıqların yerini gizlədir!
Qarabağ müharibələri dövründə 4 mindən artıq vətəndaşımızın itkin düşməsi Azərbaycan cəmiyyəti üçün ən həssas və ağrılı mövzulardan biridir. İşğaldan azad edilmiş ərazilərdə aşkar edilən kütləvi məzarlıqlar və keçirilən DNT analizləri vasitəsilə indiyədək 200-dən çox şəxsin kimliyi müəyyənləşdirilərək ailələrinə təhvil verilsə də, minlərlə soydaşımızın taleyi hələ də qaranlıq qalır. Rəsmi İrəvanın itkinlərin kütləvi dəfn olunduğu məkanlar haqqında məlumatları gizlətməsi Azərbaycanı bu məsələni beynəlxalq platformalarda, o cümlədən BMT səviyyəsində davamlı olaraq qaldırmağa vadar edir.
Məsələnin beynəlxalq hüquqi tərəflərini, Ermənistanın destruktiv mövqeyi və vətəndaş cəmiyyətinin rolu ilə bağlı Crossmedia.az-a açıqlama verən Milli Məclisin deputatı Aydın Mirzəzadə Azərbaycanın bu istiqamətdə illərdir apardığı ardıcıl mübarizəyə diqqət çəkib:
"Azərbaycan belə məlumatları Vətən müharibəsinə qədər də dəfələrlə yayırdı. Bütün beynəlxalq tribunalarda, nüfuzlu məclislərdə Ermənistanın hərbi təcavüzü nəticəsində minlərlə mülki şəxsimizin itkin düşdüyü, eləcə də bir sıra hərbi qulluqçularımızın taleyinin naməlum qaldığı bildirilib. Əlimizdə dəqiq siyahı var və Azərbaycan bununla bağlı həm beynəlxalq təşkilatlarla, həm də son dövrdə birbaşa Ermənistanla böyük iş aparır. Təəssüf ki, Ermənistan tərəfindən hələ də dəqiq izahat və ya təxmini bir informasiya yoxdur. Bu baxımdan Azərbaycan beynəlxalq təşkilatlarda məsələni yenidən qaldırmağa məcburdur. Ermənistan doğrudan da Azərbaycanla yaxşı qonşuluq münasibəti istəyirsə, bu məsələ üzərində çox ciddi şəkildə işləməlidir".
Hərbi jurnalist Rey Kərimoğlu isə məsələnin BMT müstəvisinə çıxarılmasını, axıra çatdırılmamış işləri və xüsusi təklifini dilə gətirib:
"4 mindən artıq itkin düşmüş şəxsin böyük əksəriyyətinin ermənilər tərəfindən qətlə yetirildiyi ehtimal edilir. Dövlət Komissiyası azad olunmuş torpaqlarda kütləvi məzarlıqlardan tapılan insan qalıqlarının şəxsiyyətinin müəyyənləşdirilməsi istiqamətində böyük işlər görür. Bir müddət əvvəl Beynəlxalq Avrasiya Mətbuat Fondunun sədri Umud Mirzəyev və Əmək Hüquqlarını Müdafiə Liqasının rəhbəri Sahib Məmmədov BMT-də iştirak edərək alternativ hesabat təqdim etdilər. Tədbirdə Avropa dövlətlərinin və BMT-nin nümayəndələri Ermənistan təmsilçilərinə konkret suallar ünvanlayaraq, azərbaycanlılardan üzr istənilməsini və dəfn yerlərinin açıqlanmasını tələb etdilər. Təəssüf ki, bu mühüm addım ölkə mediasında lazımi səviyyədə işıqlandırılmadı".
Ermənistan cəmiyyətinə çağırış edən Rey Kərimoğlu itkin gələnlərin xatirəsinin əbədiləşdirilməsi üçün xüsusi təkliflə çıxış edib:
"İtkin düşmüş vətəndaşlarımızın taleyi böyük ölçüdə Ermənistanın təqdim edəcəyi məlumatlardan asılıdır. Ermənistanın vətəndaş cəmiyyətinə çağırış edirəm ki, kütləvi məzarlıqların yerini açıqlasınlar. Son olaraq mənəvi bir təklifimi də bildirmək istəyirəm: Şəhidlər xiyabanlarımız var və ailələr onları ziyarət edə bilirlər. Lakin itkin düşmüş şəxslərin ailələrinin doğmalarını yad edə biləcəkləri xüsusi bir məkan yoxdur. Arzu edərdik ki, Bakıda və digər şəhərlərdə itkin düşmüş şəxslərin xatirəsinə həsr olunmuş, adı 'İtkinlər abidəsi' olan xüsusi abidələr ucaldılsın. Bu, həm ailələr üçün təsəlli olar, həm də itkinlərimizin cəmiyyətin yaddaşında yaşadığını göstərər".
Zeynəb Həsən
20:30 30.10.2026
Oxunuş sayı: 53
