Cənubi Qafqaz
İşğal dövründə Azərbaycana dəymiş ziyan ödənilir: Hüquqi mexanizm var
İşğal dövründə Qarabağ və Şərqi Zəngəzurun təbii sərvətlərinin, xüsusilə qızıl və digər faydalı qazıntı yataqlarının xarici şirkətlərin iştirakı ilə talan edilməsi, əldə olunan külli miqdarda gəlirlərin isə transmilli maliyyə kanalları vasitəsilə leqallaşdırılması təkcə ekoloji cinayət deyil, böyük maliyyə və hüquqi cinayətdir. Prezident İlham Əliyevin Bakıda İƏT-ə üzv dövlətlərin antikorrupsiya qurumlarının rəhbərlərinə müraciətində vurğuladığı kimi, bu qanunsuz gəlirlərin leqallaşdırılması və müasir rəqəmsal maliyyə alətlərindən sui-istifadə halları beynəlxalq səviyyədə ciddi antikorrupsiya mexanizmlərinin tətbiqini zəruri edir.
İşğal dövründə mənimsənilmiş sərvətlərin beynəlxalq hüquq çərçivəsində dəyərləndirilməsi, dondurulması və Azərbaycana geri qaytarılması imkanlarını Crossmedia.az-a Ədalət Partiyasının sədri Mütəllim Rəhimli şərh edib:
"İşğal dövründə Azərbaycanın təbii sərvətlərinin qanunsuz olaraq istismarı məsələsi həm iqtisadi, həm də hüquqi predmetə bağlıdır. Çünki bu gəlirlərin müəyyənləşdirilməsi və geri qaytarılması üçün beynəlxalq hüquqa müraciət etmək lazımdır və beynəlxalq hüquqda bununla bağlı müəyyən mexanizmlər mövcuddur. İlk olaraq Birləşmiş Millətlər Təşkilatının Korrupsiyaya qarşı Konvensiyası bu məsələləri özündə ehtiva edir. Konvensiya çirkli pulların yuyulmasına qarşı beynəlxalq əməkdaşlıq mexanizmini və dövlətlərarası arbitraj prosedurlarını özündə əks etdirir".
Partiya sədri qanunsuz hasilatın miqyasının və benefisiarların üzə çıxarılmasının vacibliyini diqqətə çatdırıb:
"Konkret nəticəyə nail olmaq üçün ermənilərin qanunsuz hasilatının miqyası, eyni zamanda həmin sərvətlərin hansı ölkələrə və şirkətlərə ötürülməsi ilə bağlı dəqiq informasiyalar lazımdır. Bundan başqa, satışdan əldə olunan vəsaitlərin hansı bank və maliyyə kanalları ilə hərəkət etməsi haqqında da məlumatlar tələb olunur. Burada əsas məsələ yalnız işğal dövründə istismar olunmuş sərvətlərin dəyərini hesablamaq deyil, həm də həmin gəlirlərin kimlərə çatdırıldığını müəyyənləşdirməkdir. Bunun üçün Azərbaycan beynəlxalq hüquqi əməkdaşlığı genişləndirməli və bir sıra beynəlxalq qurumlarla sıx işləməlidir".
Mütəllim Rəhimli dəymiş zərərin təzminat şəklində geri qaytarılmasının hüquqi şərtlərini vurğulayaraq fikrini yekunlaşdırıb:
"Əlbəttə, beynəlxalq hüquqda belə gəlirlərin avtomatik olaraq geri qaytarılması ilə bağlı hazır mexanizm yoxdur. Lakin biz təkzibedilməz və əsaslı sübutlar təqdim edə bilsək, eyni zamanda dövlətin ardıcıl siyasi-diplomatik təzyiqi olarsa, Azərbaycan özünə dəymiş zərərin beynəlxalq hüquqa uyğun olaraq geri qaytarılmasına hökmən nail ola bilər".
Zeynəb Həsən
13:30 30.10.2026
Oxunuş sayı: 56
