Cəmiyyət
NATO üçün Azərbaycanın malik olduğu unikal döyüş təcrübəsi niyə vacibdir?
Azərbaycan Hərbi Hava Qüvvələri komandanının müavini – Hava Döyüş komandiri general-mayor Zaur Rüstəmovun NATO-nun Avropadakı Müttəfiq Qüvvələrinin Baş Qərargahının (SHAPE) Tərəfdaşlıq Baş İdarəsinin rəisinin müavini briqada generalı Theodoros Stefou ilə Bakıda keçirdiyi görüş Azərbaycanın Alyansla hərbi-texniki tərəfdaşlığının keyfiyyətcə yeni mərhələyə qədəm qoyduğunu nümayiş etdirir. Qərb ölkələrinin mütəxəssislərinin iştirakı ilə Hərbi Hava Qüvvələrimizin zabit və gizir heyəti üçün keçirilən intensiv təlimlər, modernləşdirilən texniki park və hava hücumundan müdafiə sistemlərinin təkmilləşdirilməsi Bakının NATO standartlarına inteqrasiyasını daha da sürətləndirir.
Azərbaycan Hərbi Hava Qüvvələrinin Türkiyə, İtaliya, Britaniya, Polşa və digər NATO ölkələri ilə qurduğu çoxşaxəli əməkdaşlığı, sovet aviasiyasının qərb texnologiyaları ilə modernizasiyasını ("Su-25 Laçın" layihəsi) və pilotlarımızın unikal döyüş təcrübəsini Crossmedia.az-a hərbi ekspert Heydər Mirzə şərh edib:
"Azərbaycan Silahlı Qüvvələrinin bütün qoşun növləri, o cümlədən Hərbi Hava Qüvvələrimiz xarici tərəfdaşlarla beynəlxalq müqavilələr çərçivəsində əməkdaşlığı uzun müddətdir uğurla davam etdirir. NATO ölkələrindən danışırıqsa, ilk sırada strateji müttəfiqimiz və qardaşımız Türkiyə gəlir. İllik təlimlərimizin təxminən yarısı xarici tərəfdaşlarla keçirilir. Digər NATO tərəfdaşlarımız – İtaliya, Polşa, Britaniya, Almaniya və Fransa mütəxəssisləri dəfələrlə hərbi hissələrimizdə olub, zabit və gizirlərimiz üçün treninqlər keçiriblər".
Hərbi ekspert aviasiya parkının modernləşdirilməsi və NATO üçün Azərbaycanın malik olduğu unikal döyüş təcrübəsinin kritik əhəmiyyətini diqqətə çatdırıb:
"Son illərdə texniki parkımız tamamilə yenilənir. Türkiyə və İsrail mütəxəssisləri ilə birgə işbirliyi nəticəsində köhnə sovet Su-25 hücum təyyarələri modernləşdirilərək tamamilə yeni maşına – 'Su-25 Laçın'a çevrildi. Eyni zamanda İtaliyadan və digər Qərb istehsalçılarından yeni aviasiya vasitələri alınır. Lakin burada vacib məqam təkcə bizim öyrənməyimiz deyil, NATO-nun da bizdən öyrənməsidir. 2020-ci il 44 günlük Vətən müharibəsində pilotlarımız Su-25 və MiQ-29-larla real döyüş təcrübəsi qazandılar. Bu gün NATO üçün Rusiya və sovet aviasiyasının döyüş imkanlarını, texniki davranışını dərindən bilmək kritik xarakter daşıyır. Türkiyə ilə keçirilən birgə təlimlərdə türk pilotları Azərbaycanın Su-25 və MiQ-29-larına, bizim pilotlar isə F-16-ların sükanı arxasına əyləşirlər. Azərbaycan zabitləri NATO-nun F-16 qırıcısını rahatlıqla idarə edə bilirlər. NATO pilotlarına da sovet aviasiyasını daha yaxşı öyrənmək üçün Azərbaycanın bu təcrübəsi hava və su kimi lazımdır".
Heydər Mirzə Alyans daxilindəki siyasi ixtilaflara baxmayaraq, hərbi-texniki əməkdaşlığın inkişaf etdirilməsinin zəruriliyini vurğulayaraq fikrini yekunlaşdırıb:
"Hal-hazırda bu cür təcrübə Ukraynada yığılsa da, orada pilot və təyyarə itkiləri çoxdur, həmçinin onlar tədricən Qərb texnikasına- F-16-lara- keçirlər. Ona görə də Azərbaycanın malik olduğu bu unikal model və təcrübə NATO üçün əvəzolunmazdır. Siyasi baxımdan NATO daxilində müəyyən fikir ayrılıqları və problemlər ola bilər, lakin bu, bizi dayandırmamalıdır. Hərbi-texniki sahədə qazanılan bilik və təcrübənin qiyməti azalmır və Azərbaycan Ordusu bu imkanlardan maksimum yararlanmaqda davam edəcək".
Zeynəb Həsən
13:00 30.10.2026
Oxunuş sayı: 67
