Kallas: Qərb Rusiyanın təzyiqlərinə boyun əyməməlidir
Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas Rusiyanın danışıqlar taktikasını tənqid edərək Qərb ölkələrini Moskvanın təzyiqləri qarşısında güzəştə getməməyə çağırıb.
Crossmedia.az xəbər verir ki, Kaya Kallas bu barədə açıqlamasında bildirib. Onun Rusiyanın danışıqlar taktikası ilə bağlı mövqeyi daha əvvəl “Reuters” agentliyi tərəfindən də işıqlandırılıb.
Kallas keçmiş Sovet İttifaqı xarici işlər nazirinin fikirlərinə istinad edərək Rusiyanın danışıqlarda üç əsas üsuldan istifadə etdiyini söyləyib.
Onun sözlərinə görə, birinci mərhələdə Moskva heç vaxt ona məxsus olmayan əraziləri və ya imtiyazları tələb edir. İkinci mərhələdə ultimatumlar irəli sürülür və təhdidlər səsləndirilir.
Üçüncü mərhələdə isə Rusiya gözləmə mövqeyi tutur. Kallasın fikrincə, Moskva Qərbdə müəyyən siyasi dairələrin zamanla güzəştə getməyə hazır olacağını hesablayır.
O bildirib ki, bu yanaşmanın məqsədi ilkin mərhələdə əldə edilməsi mümkün olmayan tələblərin sonradan danışıqlar vasitəsilə təmin olunmasıdır.
Kallas Qərb ölkələrinin belə bir taktikanın nəticəsində Rusiyaya əlavə üstünlüklər verməməli olduğunu vurğulayıb.
“Buna imkan verməməliyik”, – deyə Avropa İttifaqının ali nümayəndəsi bildirib.
14:07 30.10.2026
Oxunuş sayı: 48
