Xarici xəbərlər

ABŞ Ukrayna danışıqları üçün üç Avropa ölkəsini seçib

ABŞ Rusiya-Ukrayna müharibəsinin başa çatdırılması ilə bağlı mümkün sülh danışıqlarında Almaniya, Fransa və Böyük Britaniyanı Avropanın əsas təmsilçiləri kimi nəzərdən keçirir.

Crossmedia.az xəbər verir ki, “Financial Times” qəzeti bu barədə dörd avropalı diplomata istinadən məlumat yayıb.

Nəşrin məlumatına görə, ABŞ Prezidentinin xüsusi nümayəndəsi Stiv Uitkoff və Cared Kuşner hələ sentyabr ayında Kiyevlə keçirilən danışıqlarda bu üç ölkənin E3 formatında iştirakını razılaşdırıblar.

Lakin Avropa dövlətləri arasında məsələ ilə bağlı yekdil mövqe yoxdur. Xüsusilə kiçik Avropa ölkələri Berlin, Paris və Londonun onların iştirakı olmadan bütün qitə adından qərarlar qəbul edə biləcəyindən narahatdırlar.

Avropa paytaxtlarında Vaşinqton və Moskvanın qitənin maraqlarını nəzərə almadan razılaşmalar əldə edə biləcəyi ilə bağlı da narahatlıq mövcuddur.

Söhbət xüsusilə Rusiyaya verilə biləcək təhlükəsizlik təminatlarından gedir. Avropalı rəsmilər belə razılaşmaların NATO-nun fəaliyyətinə müəyyən məhdudiyyətlər gətirə biləcəyindən ehtiyat edirlər.

Bununla belə, Avropa nümayəndələrinin danışıqlarda iştirakı hələ də qeyri-müəyyən olaraq qalır.

“Financial Times” xatırladır ki, Moskva Avropa İttifaqının Rusiya, ABŞ və Ukrayna arasında üçtərəfli danışıqlara qoşulmasına qarşı çıxır.

Rusiya Prezidentinin mətbuat katibi Dmitri Peskov daha əvvəl bildirib ki, bu formatda Avropa İttifaqının nümayəndələrinin iştirakına ehtiyac yoxdur.

Avropalı diplomatlardan birinin sözlərinə görə, nümayəndələrin kimliyini müəyyənləşdirməzdən əvvəl Avropanın danışıqlar masasında iştirakının təmin edilməsi vacibdir.