İsveçrə 6 ildən sonra Şimali Koreyada diplomatik ofisini açıb
İsveçrə altıillik fasilədən sonra Şimali Koreyanın paytaxtı Pxenyanda diplomatik nümayəndəliyinin fəaliyyətini bərpa edib. Bu addım iki ölkə arasında birbaşa siyasi dialoqun gücləndirilməsinə yönəlib.
Crossmedia.az xəbər verir ki, İsveçrənin Federal Xarici İşlər Departamenti bu barədə məlumat yayıb.
Məlumata görə, İsveçrənin xarici işlər naziri İnyatsio Kassis oktyabrın 29-da Pxenyana səfər edib. Onun səfər proqramına diplomatik ofisin rəsmi açılışında iştirak və Şimali Koreya rəsmiləri ilə siyasi danışıqlar daxildir.
Diplomatik nümayəndəlik oktyabrın 19-dan fəaliyyətini bərpa etsə də, rəsmi açılış mərasimi oktyabrın 30-na nəzərdə tutulub.
Qeyd edək ki, İsveçrənin Pxenyandakı əvvəlki nümayəndəliyi 2020-ci ilin martında COVID-19 pandemiyası ilə əlaqədar bağlanmışdı.
Yeni diplomatik ofis İsveçrənin Pekindəki səfirliyinə tabe olacaq. Şimali Koreya ilə diplomatik və konsulluq münasibətlərinin idarə olunması da həmin səfirliyin səlahiyyətində qalacaq.
İsveçrə tərəfinin məlumatına görə, diplomatik fəaliyyətin bərpasında əsas məqsəd Şimali Koreya hakimiyyəti ilə birbaşa əlaqələri genişləndirmək və iki ölkənin xarici işlər nazirlikləri arasında məsləhətləşmələri yenidən başlatmaqdır.
Danışıqlarda Koreya yarımadasında təhlükəsizlik vəziyyəti və beynəlxalq siyasi məsələlərin də müzakirəsi nəzərdə tutulur.
İnyatsio Kassis Pxenyan səfərindən sonra Cənubi Koreyanın paytaxtı Seula gedərək bu ölkənin rəsmiləri ilə görüşlər keçirəcək.
Xatırladaq ki, İsveçrə ilə Şimali Koreya arasında diplomatik münasibətlər 1974-cü ildə qurulub.
14:09 30.10.2026
Oxunuş sayı: 46
