Yəməndə husilərin hücumları nəticəsində 189 mülki şəxs həlak olub
Yəmənin Təiz vilayətində husilərin hücumları nəticəsində sentyabrın əvvəlindən indiyədək 189 mülki şəxs həyatını itirib, 281 nəfər yaralanıb.
Crossmedia.az xəbər verir ki, bu barədə Anadolu Agentliyi Yəmən Hüquq və Azadlıqlar Şəbəkəsinin hesabatına istinadən məlumat yayıb.
Hesabata görə, sentyabrın 1-dən oktyabrın 29-dək Təizdə mülki şəxslərə və obyektlərə qarşı 2 mindən çox pozuntu qeydə alınıb. Ölən və yaralananlar arasında qadınlar və uşaqlar da var.
Bildirilib ki, həmin dövrdə 324 qaçırılma və məcburi itkin düşmə hadisəsi sənədləşdirilib, 356 ev isə tamamilə və ya qismən dağılıb.
Husilərin minaatan, artilleriya, raket, pilotsuz uçuş aparatları və ballistik raketlərlə həyata keçirdiyi hücumların böyük hissəsinin yaşayış məntəqələrini hədəf aldığı qeyd olunub.
21:35 30.10.2026
Oxunuş sayı: 52
