Yaxın Şərq
30 illik işğala son qoyan Azərbaycan təcrübəsi!: BƏƏ ilə hərbi müttəfiqlikdə yeni mərhələ
Azərbaycan və Birləşmiş Ərəb Əmirliklərinin (BƏƏ) Müdafiə nazirlikləri arasında Bakıda Birgə Hərbi Əməkdaşlıq Komitəsinin ikinci iclasının keçirilməsi və iki il üçün birgə fəaliyyət planının qəbul edilməsi Yaxın Şərq və Cənubi Qafqazın geostrateji xəritəsində mühüm dönüş nöqtəsidir. Beynəlxalq Hərbi Əməkdaşlıq İdarəsinin rəisi general-mayor Elçin Abdullayev ilə BƏƏ Müdafiə Nazirliyinin nümayəndə heyəti arasında baş tutan bu görüş təkcə protokol xarakterli təmas deyil, hər iki dövlətin hərbi-texniki potensialını birləşdirən strateji yol xəritəsidir. Yaxın Şərqdə xarici hərbi təhdidlərin, ballistik raket hücumlarının və infrastruktur risklərinin kəskin artdığı bir dövrdə, eyni zamanda Ermənistanın müdafiə xərclərini 20%-dən çox artıraraq sülhə mane olduğu bir fonda Bakı-Əbu-Dabi hərbi tərəfdaşlığının dərinləşməsi xüsusi diqqət çəkir.
Prezident İlham Əliyevin həyata keçirdiyi uzaqgörən xarici siyasət nəticəsində Azərbaycan 44 günlük Vətən müharibəsində əldə etdiyi tarixi Zəfərlə 21-ci əsrin döyüş taktikalarını formalaşdıran və təcrübəsi dünya hərbi akademiyalarında tədris olunan aparıcı gücə çevrilib. Bu reallıq fonunda Azərbaycanın BƏƏ kimi güclü regional mərkəzlə hərbi tərəfdaşlığı hər iki ölkənin təhlükəsizlik zəmanətini qat-qat möhkəmləndirir.
Bu mühüm addımın hərbi-strateji əhəmiyyətini və Bakı-Əbu-Dabi oxunda formalaşan yeni müdafiə platformasını Crossmedia.az-a hərbi ekspert, ehtiyatda olan polkovnik Şair Ramaldanov şərh edib:
"Azərbaycan ilə Ərəb Əmirlikləri arasında növbəti iki il üçün planın hazırlanması və yol xəritəsi kimi qəbul edilməsi bu ölkələr arasında münasibətlərin kəskin inkişafından xəbər verir. Çünki hərbi və ya texniki əməkdaşlıq digər sahələrdə olan əməkdaşlığın etibarlılığından və münasibətlərin yüksək səviyyəsindən xəbər verən əsas göstəricidir. Azərbaycan hərbi və hərbi-texniki sahədə əməkdaşlıq üçün bütün dünya üçün açıqdır. Biz dostluq münasibətləri qurmaqda maraqlıyıq və niyyətimiz dostlarımızın sayını artırmaqdır".
Hərbi ekspert rəsmi Bakının beynəlxalq nüfuzunun artmasında Prezident İlham Əliyevin xarici siyasət kursunun müstəsna rolunu vurğulayıb:
"Bu strateji istiqamət bir çox dövlətlər tərəfindən səmimi qəbul edilir və Azərbaycanın dostları günü-gündən artır. Burada birinci növbədə Azərbaycan Respublikasının Prezidenti cənab İlham Əliyevin xarici siyasəti nəticəsində atılan addımları xüsusi qeyd etməliyik. Bu addımlar nəticəsində Azərbaycanın nüfuzu gündən-günə, ildən-ilə artır. Biz bütün beynəlxalq platformalarda sayılan bir dövlətik və belə olduğumuz halda, bu gün Azərbaycan-Ərəb Əmirlikləri arasında hərbi əməkdaşlıq sahəsində planlı şəkildə yanaşmanın şahidi oluruq".
Şair Ramaldanov Azərbaycanın Vətən müharibəsi təcrübəsinin və qlobal təhlükəsizlik böhranları fonunda BƏƏ ilə qurulan hərbi platformanın gələcək perspektivlərini diqqətə çatdıraraq fikrini yekunlaşdırıb:
"Azərbaycan 44 günlük müharibədə qısa bir zamanda 30 illik işğala son qoyaraq 21-ci əsrdə haqq müharibəsinin qələbə çalan dövlətidir. Cənab Prezident İlham Əliyevin dediyi kimi, 44 günlük Vətən müharibəsində aparılan döyüşlərin təcrübəsi bu gün inkişaf etmiş ölkələrin hərbi məktəb və akademiyalarında tədris olunur. Geosiyasi proseslərdə gedən gərginlik, xüsusilə Yaxın Şərqdə olan kritik vəziyyət, BƏƏ-nin bəzi infrastrukturlarının mütəmadi olaraq atəşə tutulması və ballistik raketlərlə vurulması müdafiə potensialının gücləndirilməsini zəruri edir. Digər tərəfdən, Ermənistanın öz müdafiə xərclərini 20%-dən yuxarı qaldırması da diqqətdən yayınmır. İki il üçün nəzərdə tutulan bu planlaşdırılmış sənəd konkret fəaliyyət istiqamətlərini təyin edir və göstərir ki, Azərbaycan-BƏƏ hərbi əməkdaşlığının böyük və parlaq perspektivləri var".
Zeynəb Həsən
20:45 29.10.2026
Oxunuş sayı: 57
