Rusiyada dronlarla yemək çatdırılması sınaqdan keçiriləcək
Rusiyada dronlar vasitəsilə yemək, dərman və bağlamaların çatdırılması üzrə pilot layihəyə başlanılacaq. Layihə ölkənin sonradan seçiləcək beş regionunda həyata keçiriləcək və sınaqlar 2027-ci ilin sonunadək davam edəcək.
Crossmedia.az xəbər verir ki, bu barədə Rusiyanın Nəqliyyat Nazirliyi məlumat yayıb.
Layihə çərçivəsində uzunluğu 20, 50 və 100 kilometr olan pilotsuz çatdırılma marşrutlarının yaradılması planlaşdırılır. Bu marşrutlar anbarları, paylama mərkəzlərini və sifarişlərin təhvil məntəqələrini birləşdirəcək.
Layihənin əsas məqsədi dronlarla çatdırılmanın ənənəvi nəqliyyat üsulları ilə müqayisədə nə qədər sürətli və sərfəli olduğunu müəyyənləşdirməkdir.
Nazirlik qeyd edib ki, oxşar layihələr artıq Nijni Novqorod vilayətində və Yakutiyada həyata keçirilib. Nijni Novqorod vilayətində dronlar müştərilərə təxminən 2,5 min sifariş çatdırıb. Yakutiyada isə pilotsuz uçuş aparatları ümumi çəkisi 670 kiloqram olan 288 bağlama daşıyıb.
19:58 29.10.2026
Oxunuş sayı: 49
