Dollara tələbat niyə artıb? - AÇIQLAMA
2024-cü ildə ölkəmizdə ABŞ dollarına tələbin əvvəlki illərə nisbətən çox olması diqqəti cəlb edir. 2024-cü ilin yanvar-noyabr ayları ərzində Azərbaycan Mərkəzi Bankı tərəfindən keçirilən 87 valyuta hərracında 6 milyard 603 milyon 870 min məbləğində ABŞ dolları satılıb. Bu da ötən ilin eyni dövrü ilə müqayisədə iki dəfə çox deməkdir. Ötən ilin eyni ayları ərzində keçirilən valyuta hərraclarında 3 milyard 274 milyon 730 min ABŞ dolları satılmışdı. Təkcə ötən ay ərzində keçirilən 7 valyuta hərracında satış 487 milyon 100 min dollar təşkil edib. Bəs dollar satışının artmasının əsas səbəbləri nələrdir? Dünya iqtisadiyyatı və ya geosiyasi amillərin bu artıma təsiri varmı?
Məsələ ilə bağlı iqtisadçı Natiq Cəfərli Crossmedia.az saytına açıqlamasında bildirib ki, Azərbaycanda dollara tələbatın artımı əvvəlki illərdə də müşahidə olunurdu:
"Büdcə xərcləri yüksəlib əlavə xərclər yaranan zaman dollara tələbat da özünü göstərir. Bu il dollar satışının keçən ilə nisbətən artmasının əsas səbəbi idxaldan asılılığın davam etməsidir. Biz demək olar ki, hər şeyi xaricdən alırıq. Təmir və tikinti işləri üçün, xüsusilə də, Qarabağın bərpa olunmasına çoxlu sayda həm avadanlıq, həm tikinti materialları xaricdən gətirilib. Bunlar hamısı valyutaya olan tələbatdır. Digər tərəfdən vətəndaşların arasında artıq manatın məzənnəsinin dəyişəcəyi ilə bağlı fikir formalaşıb. Ona görə də vətəndaşlar əllərində olan manatla sərbəst vəsaiti xarici valyutaya çevirməyi düşünürlər, bununla bağlı addımlar atırlar. Bu da valyutaya olan tələbatın artmasına səbəb olub. Yəni bu gün dünyadan yox, Azərbaycanın daxilindən qaynaqlanan məsələlərə görə dollara tələbatın yüksəlməsinin şahidi oluruq".
Gülşad İbrahimova
17:47 09.12.2024
Oxunuş sayı: 18398
