Rusiyanın xarici işlər naziri Sergey Lavrov Cənubi Qafqazda yolların açılması məsələsinə münasibət bildirib.
Crossmedia.az xarici mediaya istinadən xəbər verir ki, o, bu barədə Ermənistan parlamentinin sədri Alen Simonyanla görüşü zamanı danışıb.
Lavrov qeyd edib ki, Ermənistan, Rusiya və Azərbaycan arasında 2020–2022-ci illərdə liderlər səviyyəsində əldə olunan üçtərəfli razılaşmalar regionda mövcud iqtisadi, nəqliyyat və logistika problemlərinin həlli üçün hələ də aktuallığını qoruyur.
“Cənubi Qafqazda vəziyyətin nə qədər mürəkkəb olduğunu görürük. Rusiya, Azərbaycan prezidenti və Ermənistanın baş naziri səviyyəsində razılaşdırılmış əsaslar, bizim qənaətimizə görə, regionda bütün iqtisadi, nəqliyyat və logistika problemlərinin həlli üçün kifayət edir”, – deyə Lavrov vurğulayıb.
Onun sözlərinə görə, bu qərarların həyata keçirilməsindən Ermənistan ciddi şəkildə fayda əldə edəcək və regionun normal fəaliyyətinə mane olan bütün əngəllər aradan qaldırılmalıdır.
Lavrov xatırladıb ki, üç ölkənin baş nazir müavinləri qəbul edilmiş razılaşmalar çərçivəsində mütəmadi əlaqə saxlayırlar.
Qeyd edək ki, kommunikasiyaların açılması üzrə Ermənistan, Rusiya və Azərbaycanın baş nazir müavinlərinin – Mher Qriqoryan, Aleksey Overçuk və Şahin Mustafayevin həmsədrlik etdiyi üçtərəfli işçi qrupunun son iclası 2023-cü ilin iyununda Moskvada keçirilib.
