Şəmxani: ABŞ hücum edərsə, İran İsrail hədəflərinə zərbə endirəcək
İranın ali rəhbərinin müşaviri Əli Şəmxani ABŞ ilə mümkün hərbi qarşıdurma ilə bağlı sərt bəyanatla çıxış edib.
Crossmedia.az bu barədə xarici mediaya istinadən xəbər verir.
O bildirib ki, İran ABŞ tərəfindən hər hansı hücuma məruz qalacağı təqdirdə, cavab addımı olaraq İsrail hədəflərinə zərbələr endirəcək.
Şəmxaninin sözlərinə görə, düşmənin niyyətlərini əks etdirən istənilən addım “mütənasib, təsirli və çəkindirici cavabla” qarşılanacaq. O vurğulayıb ki, bu cavab tədbirləri sırasında İsrailə birbaşa zərbələrin endirilməsi də istisna olunmur.
İran rəsmisi əlavə edib ki, Tehran mümkün hücum ssenarilərini əvvəlcədən müəyyənləşdirib və mövcud vəziyyət üzərində tam nəzarətə malikdir. Onun sözlərinə görə, İran qarşıdurma halında cavabını yalnız dəniz məkanı ilə məhdudlaşdırmayacaq.
Şəmxani bildirib ki, İslam Respublikası daha geniş coğrafiyanı əhatə edən və daha mürəkkəb hərbi-siyasi ssenarilərə hazırdır. Bu açıqlama regionda onsuz da yüksək olan gərginliyi daha da artıran mesaj kimi qiymətləndirilir.
12:55 31.01.2026
Oxunuş sayı: 539
