Ayətullah Sistani: İranın hədəf alınması region üçün böyük təhlükədir
Nəcəf Şiə Məktəbinin lideri Ayətullah Əli Sistani bölgədə artan gərginliklə bağlı mühüm açıqlama verib.
Crossmedia.az xarici mediaya istinadən xəbər verir.
O bildirib ki, iraqlılar yalnız öz ölkələrinin müdafiəsinə cavabdeh olmalı, məzhəb qarşıdurmalarından isə qəti şəkildə uzaq durmalıdırlar.
Sistaninin sözlərinə görə, məzhəb müharibəsi nə İraqa, nə də bütövlükdə regiona hər hansı fayda gətirməyəcək. O vurğulayıb ki, İraq bütün dövlətlərlə normal və balanslı münasibətlərini davam etdirməlidir.
Ayətullah qeyd edib ki, İraqın sərhədlərinə və milli təhlükəsizliyinə birbaşa təhdid olmadığı müddətcə ölkə heç bir regional prosesə cəlb olunmamalıdır.
Onun fikrincə, region ölkələrinin daxili problemləri yalnız həmin dövlətlərin özləri tərəfindən həll edilməlidir.
Sistani İraq xalqını təmkinli olmağa, region liderlərini isə dialoq və müzakirələr üçün bir araya gəlməyə çağırıb.
O, İranın hədəf alınmasının bütün Yaxın Şərq üçün ciddi təhlükə yaratdığını və regional sabitliyi sarsıtdığını xüsusi olaraq qeyd edib.
19:15 30.01.2026
Oxunuş sayı: 550
