Gözümüzü yuma bilmərik – Aİ-də Ukrayna ilə bağlı açıq xəbərdarlıq
Lüksemburqun xarici işlər naziri və ölkənin keçmiş baş naziri Xavier Bettel Ukraynanın 2027-ci ilə qədər Avropa İttifaqına üzvlük perspektivlərinə ehtiyatla yanaşdığını bildirib.
Crossmedia.az bu barədə xarici mediaya istinadən xəbər verir.
Nazir Avropanın Ukraynaya güclü siyasi dəstəyini bir daha təsdiqləsə də, prezident Volodimir Zelenskinin Ukraynanın yaxın illərdə Aİ-yə qəbul olunması ilə bağlı çağırışlarını tənqid edib. Bettelin sözlərinə görə, bu məsələdə ultimatum dili düzgün yanaşma deyil.
“Prezident Zelenskinin Ukraynanın artıq gələn il üzv olması lazım olduğunu dediyini eşitmişəm. Bağışlayın, amma mən ona bir neçə dəfə demişəm: ultimatum verməyin. Bu, sizin maraqlarınıza uyğun deyil”, – deyə nazir vurğulayıb.
Xavier Bettel qeyd edib ki, Aİ-yə üzvlük üçün bütün namizəd ölkələr Kopenhagen meyarlarına əməl etməlidir və bu qaydalara istisna edilə bilməz:
“Bəziləri üçün meyarların mövcud olduğunu, bəziləri üçün isə olmadığını deyə bilmərik. Kopenhagen meyarları yerinə yetirilənə qədər "ailəyə gəlin, biz də gözlərimizi, qulaqlarımızı bağlayaq" deyə bilmərik. Xeyr. Bizim qaydalarımız var və biz onlara hörmət etməyə borcluyuq.”
Nazirin sözlərinə görə, Ukraynanın Aİ-yə üzvlüyü məsələsində əsas prinsip dəstəkdən imtina yox, prosedur və meyarların qorunmasıdır.
09:44 30.01.2026
Oxunuş sayı: 451
