Xarici xəbərlər
Erməni hərbi ekspert: Ermənistan ya Azərbaycanın, ya da Türkiyənin idarəçiliyinə verilə bilər
“ABŞ ilə həyata keçirilən TRIPP layihəsi (Zəngəzur dəhlizi-red.) əslində Türkiyə və Azərbaycana verilən ekstraterritorial dəhlizdir”.
Crossmedia.az Ordu.az-a istinadən xəbər verir ki, bunu hərbi və təhlükəsizlik məsələləri üzrə erməni ekspert, ehtiyatda olan polkovnik Hayk Nahapetyan deyib.
Nahapetyanın sözlərinə görə, TRIPP-in reallaşdırılması və ona paralel gedən proseslər nəticəsində Ermənistan ya Azərbaycanın, ya da Türkiyənin idarəçiliyinə verilə bilər.
Erməni polkovnik hesab edir ki, bu inkişafın qarşısını almaq imkanları var, lakin bunun üçün ilk növbədə vəziyyəti düzgün qiymətləndirmək lazımdır. Onun fikrincə, vəziyyəti adekvat dəyərləndirmədikcə qələbə mümkün deyil.
Bu kontekstdə o, Nikol Paşinyanın rəhbərlik etdiyi hakimiyyət tərəfindən Erməni Apostol Kilsəsinə qarşı həyata keçirilən təzyiqlərə də toxunaraq bildirib ki, “hakimiyyət müharibə aparır”, bütün ermənilərin katolikosu II Qaregin isə bu müharibənin ilk səngərində dayanıb.
“Kilsə müqavimətin son halqasıdır. Kilsə mövcud hakimiyyətlərin xalqımıza elan etdiyi müharibəyə qarşı ilk müdafiə xətti kimi dayanmağa çalışır. Hakimiyyət bizim kimliyimizə, tarixi yaddaşımıza qarşı elan olunmamış müharibə aparır. Hakimiyyət xalqımıza qarşı müharibə aparır.
Müharibənin öz qanunları var və müharibənin məqsədi rəqibi məğlub etməkdir. Əgər xalqımız bu ruh halı ilə ayağa qalxsa, bu ruh halı çox tez, gec-tez hakimiyyətə münasibətdə də dəyişə bilər və bu, hakimiyyətin sonunun başlanğıcı ola bilər”, - deyə erməni polkovnik qeyd edib.
12:20 23.01.2026
Oxunuş sayı: 804
