Çin maşın yox, casus satırmış: hərbi zonalarda qadağan edildi
Polşa hakimiyyəti Çin istehsalı olan avtomobillərin hərbi obyektlərin yaxınlığında park edilməsinə və bu ərazilərə girişinə qadağa tətbiq edib.
Crossmedia.az xəbər verir ki, qərar milli təhlükəsizlik riskləri ilə əsaslandırılıb.
Rəsmi qurumların açıqlamasında bildirilir ki, kameralar və müxtəlif sensorlarla təchiz olunmuş “ağıllı” avtomobillər hərbi obyektlər barədə məlumat toplaya, ərazini daimi monitorinq edə və hərbçilərin hərəkətlərini izləyə bilər. Polşa tərəfi bu texnoloji imkanların potensial kəşfiyyat riski yaratdığını istisna etmir.
Narahatlığı artıran məqam Çin avtomobillərinin Polşa bazarında sürətlə artmasıdır. Təkcə 2025-ci ilin dekabr ayında ölkədə 9 821 yeni Çin avtomobili qeydiyyata alınıb. Bu rəqəm ötən illə müqayisədə 427 faiz artım deməkdir və təhlükəsizlik qurumlarının diqqətini daha da gücləndirib.
Qeyd edək ki, Avropa İttifaqı da Çin texnologiyalarına qarşı ehtiyatlı mövqe tutur. Hazırda Avropa Komissiyası üzv ölkələrin telekommunikasiya şəbəkələrində Huawei və ZTE texnologiyalarından istifadənin məhdudlaşdırılması və ya qadağan edilməsi imkanlarını araşdırır. Bu müzakirələr də təhlükəsizlik riskləri fonunda aparılır.
18:12 22.01.2026
Oxunuş sayı: 1036
