"Yüksəliş" qalibi: "Komandada ən güclü olmaq məqsəd olmamalıdır, komandanı güclü etmək daha önəmlidir" - MÜSAHİBƏ
Son illərdə ölkəmizdə həyata keçirilən “Yüksəliş” müsabiqəsi qısa müddət ərzində cəmiyyətin böyük marağına səbəb olan, peşəkarlıq və şəffaflıq prinsiplərinə əsaslanan nüfuzlu bir platformaya çevrilib. Layihənin əsas missiyası yüksək intellektual potensiala malik, idarəetmə bacarıqları ilə seçilən gəncləri üzə çıxarmaq, onların bilik və təcrübəsini daha geniş miqyasda tətbiq etmək üçün yeni imkanlar yaratmaqdır. Bu təşəbbüs dövlətimizin insan kapitalının inkişafına, xüsusən də istedadlı və məqsədyönlü gənclərə göstərdiyi diqqətin bariz təzahürüdür. Müsabiqənin əvvəlki illərdəki finalçılarının bu gün ölkənin müxtəlif sahələrində mühüm qərarların icrasında yaxından iştirak etməsi “Yüksəliş”in praktiki nəticələrinin və təsir gücünün ən parlaq göstəricisidir. Layihə həm idarəetmədə innovativ yanaşmanı təşviq edir, həm də keyfiyyətli kadr ehtiyatının formalaşmasına sistemli şəkildə töhfə verir. Hər il üzə çıxarılan onlarca istedadlı gəncin inkişaf üçün yeni perspektivlər qazanması proqramın strateji əhəmiyyətini bir daha ön plana çıxarır.
Bu dəfəki müsahibimiz IV “Yüksəliş”müsabiqəsinin qaliblərindən Səbuhi Göyüşovdur. Həmin müsahibəni təqdim edirik:
— Müsabiqə təcrübəsi, "Yüksəliş" müsabiqəsində qalib gəlmək sizin üçün nə deməkdir və bu uğra gedən yolda ən böyük motivasiyanız nə oldu?
— "Yüksəliş" müsabiqəsində qalib gəlmək özünü sübut etmək üçün ən yaxşı vasitələrdən biridir. Nəzərə almaq lazımdır ki, bu müsabiqə ölkədəki ən önəmli və prestijli müsabiqələrdən biri hesab edilir və sən burada ən güclü rəhbərlərlə özünü müqayisə edə bilirsən. Bu baxımdan burada fərqlənmək özünü isbat etmək üçün ən yaxşı üsullardan biridir. Motivasiyama gəldikdə isə düşünürəm ki, insanlar daimi öz komfort zonalarından çıxmağa çalışmalıdır. Bunu daimi bacarmırıqsa, ən pis halda 3-4 ildən bir etməliyik. Komfort zonada daimi qalmaq özünü inkişaf etdirməyə ən çox mane olan ünsürlərdən ola bilər. Yalnız komfort zondan çıxaraq həyatda biz uğur qazana bilərik. Bu baxımdan "Yüksəliş" mənə özümü komfort zondan çıxardaraq uğur qazanmaq üçün əlavə motivasiya vermişdi.
— Hazırlıq prosesi zamanı müsabiqəyə necə hazırlaşırdınız və hansı üsullar sizə kömək etdi hansı çətinliklərlə üzləşdiniz?
— Düzü, mən tamam inanmıram ki, "Yüksəliş"ə spesifik hazırlaşmaq olar. Bu müsabiqə öz müxtəlif mərhələləri ilə elə tərtib edilib ki, hansısa spesifik hazırlaşmaqla kodu sındırmaq, müsabiqə qalibi olmaq mümkün görünmür. Odur ki, "Yüksəliş" üçün həyat boyu topladığın təcrübə və rəhbərlik bacarığı daha çox önəmlidir. Məsələn 2024-cü ildə "Yüksəliş"də qalib olarkən artıq 3 ildən çox departament direktorluğu təcrübəm və 5-6 illik şöbə müdürü təcrübəm var idi. Düşünürəm ki, bu təcrübələr mənə müsabiqədə fərqlənməyə daha çox imkan yaratmışdır. Təbii ki, hər bir müsabiqə üçün hazırlaşmaq, kitab oxumaq və xüsusi resurslardan istifadə etmək həmişə faydalıdır, lakin dediyim kimi, "Yüksəliş" daha çox təcrübələri göstərdiyin yerdir. Məsələn, mən 2023-cü ilin finalında uğursuzluğa düçar olmuşdum, məhz buradan öyrəndiyim təcrübələr belə mənə 2024-cü ildə qalib olmağa daha çox kömək etdi.
— Bu müsabiqədə iştirak etməyə ilham verən əsas səbəb nə idi?
— "Yüksəliş" komandasının, yəqin ki, ən yaxşı etdiklərindən biri də müsabiqənin önəmi barədə maarifləndirmə işlərini yaxşı görməkdir. Elə ilk elandan yarışın əhəmiyyətini başa düşmək olurdu. Və sən tam anlayırsan ki, 20 min nəfərə yaxın adamın iştirak etdiyi müsabiqədə 20 nəfər qalib arasına yüksəlmək necə böyük uğurdur. Habelə, biz öz şirkətlərimizdə yüksək vəzifələrdə ola bilərik, amma burada sən yalnız şirkətdaxili özünü müqayisə edə bilirsən, "Yüksəliş" isə insana elə bir platforma verir ki, sən bunun vasitəsilə özünü həm özəl, həm dövlət, həm qeyri-kommersiya sahələrindən şəxslərlə müqayisə edirsən, çatışmazlıqlarını çox daha rahat görə bilirsən.
— Şəxsi bacarıqlarınız qalib olmağınızda hansı rol oynadı?
— Yəqin ki, burada mən nəticəyönümlülük və qərarvermə deməliyəm. Bu mənim adətən "360 dərəcə" qiymətləndirmə nəticələrimdə də çıxır. Bunlardan əlavə, komanda oyunçusu olmaq da önəmlidir. Uzun illərdir ki, intellektual oyunlar oynayıram. Məsələn "Nə?Harada?Nə zaman?" intellektual oyununda iştirak edərkən də, önəmli olan komandanın sualı tapmasıdır. Komanda daxilində sualı kim tapır, bu heç də önəmli deyil. Mənim üçün "Yüksəliş"də də belə oldu. Komandamda ən güclü olmaq mənim məqsədim deyildi, komandanı güclü etmək daha önəmli idi.
— Bu müsabiqə sizə hansı dəyərləri öyrətdi?
— "Öyrətdi"dən daha çox, layihə mənə bir daha təsdiqlədi ki, siz əgər öz səhvlərinizdən nəticə çıxara bilirsinizsə, bu zaman uğur da qaçınılmazdır. Bayaq da dediyim kimi, 2023-cü ildə uğursuz olanda, öz nəticələrimi təhlil etdim, səhvlər üzərində işlədim və nəticə uğurlu alındı.
— Çətin anlarda psixoloji olaraq özünüzü necə motivasiya edirdiniz?
— "Yüksəliş"in xüsusilə yarımfinal və final mərhələləri çox intensivdir. Burada biz 15-dən çox kazus oynayırıq. Bu zaman, yəqin ki, hər kazusa müstəqil yanaşmaq çox daha önəmlidir. Əvvəlki kazusda ilişib qalmamaq, hər yeni tapşırığa yeni motivasiya ilə başlamaq lazımdır. Bir də təbii ki, uğurlu olmaq üçün komanda uğuru daha önəmlidir. Komandanın uğuru üçün də üzvlər arasında feedback-lər çox önəmlidir. Mən daimi feedback-lər verirdim.
— Müsabiqəyə qatılmaq istəyənlərə tövsiyəniz nədir?
— İlk olaraq hər kəsə müsabiqəyə qatılmağı tövsiyə edirəm. "Yüksəliş" yalnız müsabiqə deyil, həm də təcrübə öyrənmək, networking və mentorlarla tanış olmaq üçün platformadır. Siz artıq qərar vermisiniz, nələr etməlisiniz? Yəqin ki, əvvəlcə bunun günün sonunda müsabiqə olduğunu unutmamaq və daimi buradan maksimum nəticə əldə etməyə çalışmalısınız. Yalnız "Yüksəliş" üçün yox, biz özümüzü inkişaf etdirmək üçün "lifelong learning" etməliyik. Bu zaman biz uğurlu olacağıq. "Yüksəliş"də, şəxsi karyerada və ya digər məqsədlərimizdə. Hər kəsə indidən uğurlar!
Elmir Heydərli
18:34 05.12.2025
Oxunuş sayı: 3929
