Texnologiya
WhatsApp hesablarına hücumlar artır: Mütəxəssisdən xəbərdarlıq
Son zamanlar “WhatsApp” üzərindən istifadəçi hesablarına icazəsiz daxilolma cəhdlərinin sayında ciddi artım müşahidə olunur.Qeyd olunub ki, naməlum mənbələrdən göndərilən keçidlərə daxil olmaq, tanımadığınız şəxslərdən gələn linkləri açmaq və doğrulama kodlarını paylaşmaq təhlükəsizlik baxımından böyük risk daşıyır.
Məsələ ilə bağlı İKT mütəxəssisi Elvin Abbasov Crossmedia.az saytına açıqlamasında bildirib ki, “
WhatsApp hesablarına icazəsiz giriş cəhdlərinin artması bir neçə paralel faktorla əlaqəlidir: "Son aylarda fişinq mesajlarının çoxalması, qısa müddətdə əldə olunan SIM kart məlumatlarının sui-istifadəsi və sosial mühəndislik üsullarının daha təkmilləşdirilməsi dələduzların əsas alətlərinə çevrilib. Hücumçular istifadəçiləri doğrulama kodlarını paylaşmağa sövq edən müxtəlif ssenarilər qurur, bəzi hallarda isə zəif qurulmuş təhlükəsizlik parametrlərindən yararlanaraq hesabların ələ keçirilməsinə cəhd edirlər. Bu tendensiyanın sürətlənməsi həm də ondan irəli gəlir ki, mesajlaşma platformaları artıq bir çox xidmətlərə giriş üçün identifikasiya vasitəsinə çevrilib və buna görə hədəf daha cəlbedicidir.
İstifadəçilər bu hücumlardan praktik addımlarla özlərini effektiv şəkildə qoruya bilərlər. İki mərhələli təsdiqləmə funksiyasının aktiv edilməsi WhatsApp hesabının müdafiəsində ən güclü vasitələrdən biridir, çünki doğrulama kodu əldə olunsa belə, əlavə PIN tələb olunur. Naməlum nömrələrdən gələn linklərə, zənglərə və ya doğrulama kodu istəklərinə heç vaxt reaksiya verilməməlidir. Eyni zamanda, telefonda SIM kart dəyişikliklərinə dair xəbərdarlıqlar diqqətlə izlənməli, mobil operator hesablarında təhlükəsizlik parametrləri gücləndirilməlidir. İstifadəçi öz hesabında gözlənilməz çıxış bildirişləri görərsə, dərhal cihaz əlaqələrini yoxlamalı və təhlükəsizlik parametrlərini yeniləməlidir. Burada əsas prinsip sadədir: WhatsApp heç vaxt doğrulama kodu istəmir və kodun paylaşılması yalnız hesabın ələ keçirilməsi ilə nəticələnir"
Fatimə Eynullazadə
12:10 22.11.2025
Oxunuş sayı: 2384
