Azərbaycan kosmosa çıxır: Mütəxəssis detalları açıqladı
Azərbaycan son illərdə kosmik fəaliyyətlərini genişləndirərək Cənubi Qafqazda və daha geniş coğrafiyada strateji kosmos mərkəzinə çevrilir. “Azərkosmos”un icra etdiyi layihələr ölkənin kosmik texnologiyalar və rəqəmsal transformasiya xəritəsində mövqeyini əhəmiyyətli dərəcədə gücləndirir. Bakıda keçirilən Qlobal Gənclər Günü (GYC-25) çərçivəsində Kosmik Akademiyanın rəhbəri İmran Muxtarov bildirib ki, Azərbaycan təkcə region üçün deyil, həm də Mərkəzi Asiya məkanı üçün rəqəmsal kosmos keçidinin aparıcı qüvvəsinə çevrilir. WTDC-25 çərçivəsində təşkil olunan tədbirin özü ölkənin kosmik ambisiyalarını, eyni zamanda gənclərin innovasiya proseslərinə fəal inteqrasiyasını göstərən mühüm platforma oldu.
Crossmedia.az-a açıqlama verən İnformasiya Texnologiyaları mütəxəssisi Elvin Abbasovun sözlərinə görə, Azərbaycan kosmos sənayesində mövqeyini daha da möhkəmləndirmək üçün strategiyasını əsasən yeni nəsil peyk infrastrukturu və Yerin müşahidəsi sistemlərinin modernləşdirilməsi üzərində qurur. Mütəxəssis qeyd edir ki, mövcud rabitə və müşahidə peyklərinin imkanlarının genişləndirilməsi ilə yanaşı, yeni optik və radiolokasiya müşahidə peyklərinin hazırlanması və orbitə çıxarılması yaxın dövr üçün prioritet istiqamətlərdəndir. Onun sözlərinə görə, xüsusilə yerli montaj və istehsal elementlərinin artırılması həm texnoloji suverenliyə töhfə verir, həm də sənayenin xarici təchizatdan asılılığını azaldır: "Bakı Teleportunun yenilənməsi, idarəetmə stansiyalarının gücləndirilməsi və kosmik nəzarət infrastrukturunun modernləşdirilməsi Azərbaycanı regionun ən dayanıqlı və təhlükəsiz kosmik xidmət mərkəzlərindən birinə çevirir. Kiçik peyk layihələrinin təşviqi, startap ekosisteminin genişləndirilməsi və rezidentlər üçün texnoloji imkanların artırılması isə kosmik sənayenin gələcək inkişafı baxımından mühüm baza formalaşdırır".
Mütəxəssis bildirin ki, bu addımlar ölkənin strateji rəqəmsal inkişaf trayektoriyasına birbaşa təsir göstərir: "Kosmik müşahidə məlumatlarının dövlət və özəl sektorun müxtəlif sahələrinə inteqrasiyası idarəetmədə operativlik yaradır, resursların daha səmərəli və dəqiq istifadə edilməsinə şərait yaradır. Peyk üzərindən göstərilən rəqəmsal xidmətlərin genişləndirilməsi isə ölkənin bütün bölgələrində bərabər rəqəmsal əlçatanlığı gücləndirir. İnsan kapitalının inkişafına yönəlmiş kosmik təhsil təşəbbüsləri və texnoloji layihələr yaxın illərdə yerli mütəxəssislərin sənayenin aparıcı qüvvəsinə çevrilməsini təmin edəcək. Ümumi mənzərə göstərir ki, Azərbaycan kosmik sənayeni təkcə peyk xidməti kimi deyil, həm də ölkənin texnoloji tərəqqisini sürətləndirən, rəqəmsal çevikliyini artıran və regional liderlik iddiasını möhkəmləndirən strateji sahə kimi formalaşdırır".
Mehriban Yariyeva
15:39 17.11.2025
Oxunuş sayı: 1352
