"Azərkosmos" “Azersky-2” layihəsi çərçivəsində "SpaceX" ilə əməkdaşlıq edəcək
Azərbaycanda peyklərin istehsalını yaxın gələcəkdə reallaşdıracağıq. Bunun üçün artıq ilk addımlarımızı atdıq: Tədqiqat və İnkişaf üzrə komandamız artıq 1 il yarımdır ki, mürəkkəb siyasi şəraitdə olsa da İsraildə Azersky-2 layihəsi çərçivəsində peykin istehsalı üzrə intensiv təlimlər keçirlər.
Crossmedia.az xəbər verir ki, bunu Azərbaycan Kosmik Agentliyinin ("Azərkosmos") İdarə Heyəti sədrinin vəzifələrini müvəqqəti icra edən Dunay Bədirxanov "Kosmosdan gələn imkanlar: Kosmik müşahidəmizin sosial-iqtisadi inkişafa töhfəsinin 10 ili" adlı tədbirində bildirib.
Onun sözlərinə görə, peyk istehsalı zavodu və istehsalata cəlb ediləcək işçilər üçün Kosmik Aparatların İnkişafı Mərkəzinin qurulması üzrə dizayn və layihələndirmə işlərinə yekun vurulub: "Mərkəz üçün tikinti yerimiz məlumdur. Yaxın aylarda tikintiyə başlayacağıq. Peykimizin daşıyıcı raketi olaraq SpaceX şirkətini seçmişik".
"Bununla yanaşı, Azərkosmos tarixində ilk dəfə törəmə müəssisə - Kosmik Aparatların İstehsalı Mərkəzi - “Spacecraft Development and Production” MMC yaratdıq. MMC kosmik aparatların istehsalı layihələrimizi daha asan şəkildə həyata keçirməkdə dəstək olacaq", - deyə D. Bədirxanov vurğulayıb.
10:31 21.10.2025
Oxunuş sayı: 6975
