Pakistanlı tədqiqatçı Ədəbiyyat İnstitutunun qonağı olub
Pakistanın Müsəlman İnstitutunun (Muslim Institute) tədqiqatçısı Muhammed Azeem AMEA Nizami Gəncəvi adına Ədəbiyyat İnstitutunda olub. Qonaq əvvəlcə Ədəbiyyat İnstitutunun Pakistan Mərkəzi ilə tanış olub.
İnstitutdan Crosssmedia.az-a bildirilib ki, Azərbaycan-Asiya ədəbi əlaqələri şöbəsinin müdiri professor Bədirxan Əhmədov Mərkəzin fəaliyyəti ilə bağlı qonağa ətraflı məlumat verib.
Ədəbiyyat İnstitutunun direktor müavini dosent Mehman Həsənli qonağa Pakistan ədəbiyyatının araşdırılması ilə bağlı həyata keçirilən işlərdən bəhs edib. Direktor müavini Ədəbiyyat İnstitutunun Pakistanın Ədəbiyyat Akademiyası, Müsəlman İnstitutu və Lahor Universiteti ilə birlikdə bir sıra elmi konfrans, sessiyalar təşkil etdiyini diqqətə çatdırıb. O, Pakistanın görkəmli şairi Məhəmməd İqbal haqqında institutun əməkdaşı Bəsirə Əzizəliyevanın tədqiqat apardığını və eləcə də bu mövzuda monoqrafiyasının, həmçinin İqbalın əsərlərinin tərcümə edilərək kitab halında institut tərəfindən nəşr edildiyini bildirib. Pakistanın sufi şairi Sultan Bahonun əsərlərinin institut tərəfindən çapa hazırlandığını diqqətə çatdırıb.
Muhammed Azeem çıxışında Ədəbiyyat İnstitutu ilə əməkdaşlığın, birgə fəaliyyətin əhəmiyyətindən danışıb. Müsəlman İnstitutunun ikitərəfli əməkdaşlığa böyük önəm verdiyini diqqətə çatdırıb.
Görüşdə Bakı Dövlət Universitetinin urdu dili müəllimi Eldost İbrahimov, Ədəbiyyat İnstitutunun beynəlxalq əlaqələr şöbəsinin müdiri Nigar İsayeva da çıxış ediblər.
02:17 01.10.2025
Oxunuş sayı: 1044
